اۋىل ەجەلدەن-اق حالقىمىزدىڭ ۇيىتقىسى، ىرىستىڭ باستاۋى بولىپ سانالادى. قازاقتىڭ قاسيەتتى قۇت مەكەنى – اۋىلدىڭ قازىرگى جاعدايى ايتپاسا دا تۇسىنىكتى. ونسىز دا سانى جىل سايىن ازايىپ جاتقان اۋىلدارىمىز قاڭىراپ قالماسىن دەسەك اۋىل شارۋاشىلىعىنىڭ دامۋىنا باسا كوڭىل ءبولۋىمىز قاجەت. اۋىل جاعدايى قۇلدىراسا قازاقتىڭ دا جاعدايى مۇشكىل بولماق.

وسى ورايدا اۋىل شارۋاشىلىعىن دامىتۋدىڭ بىردەن-ءبىر جولى – اۋىل شارۋاشىلىعى تاۋارلارىن وندىرۋشىلەرگە قولداۋ كورسەتۋ.

بۇنىڭ بارلىعى تۇپتەپ كەلگەندە ەلىمىزدەگى ەڭ وزەكتى ماسەلەلەردىڭ ءبىرى – ازىق-تۇلىك تاۋارلارىنىڭ قىمباتتاۋىنا اكەپ سوعۋدا.

بۇل ماسەلەنى "اۋىل" پارتياسىنىڭ فراكتسياسى اۋىل شارۋاشىلىعىن تۇراقتى دامىتۋ باعدارى ارقىلى شەشۋدى ۇسىنادى.

شىنى كەرەك، «اۋىل – ەل اسىراۋشىسى» دەسەك تە، ءىس جۇزىندە ءبارى باسقاشا. بۇل تۋرالى مەملەكەت باسشىسى كەشەگى الەۋمەتتىك-ەكونوميكالىق دامۋ جونىندەگى كەڭەسىندە «اۋىل شارۋاشىلىعى جانە ءوندىرىس سالاسىنىڭ دامۋىندا ناقتى ناتيجە جوق. ازىق-تۇلىك ينفلياتسياسىنىڭ باستى سەبەبى دە – وسىندا. ەلىمىزدە وندىرىلەتىن تاۋاردىڭ كولەمى ىشكى سۇرانىستى قامتاماسىز ەتۋگە جەتپەيدى. يمپورتقا تاۋەلدىمىز»، - دەپ اتاپ ءوتتى.

وسى ماسەلەنى ەسكەرە كەلە، «اۋىل» پارتياسىنىڭ فراكتسياسى كەلەسىدەي ۇسىنىستى جولدايدى: اۋىل شارۋاشىلىعى تاۋارلارىن وندىرۋشىلەردى سالىقتار مەن تولەمدەردىڭ بارلىق تۇرلەرىنەن بوساتۋ. ونىڭ ىشىندە، اۋىل شارۋاشىلىعى ءونىمىن شىعارۋ، قايتا وڭدەۋ، وتكىزۋ، ەكسپورتتاۋ، يمپورتتاۋ بويىنشا اينالىمداردى قوسىلعان قۇن سالىعىنان دا بوساتۋ. بۇل اۋىل پارتياسىنىڭ سايلاۋالدى باعدارلاماسىندا ەرەكشە كوڭىل بولىنگەن ماسەلەنىڭ ءبىرى.

وسىعان بايلانىستى سالىقتىڭ ەكى ءتۇرلى قىزمەتى بار ەكەنىن ەسكە سالعىم كەلەدى. ونىڭ ءبىرى فيسكالدى بولسا، ەكىنشىسى – ىنتالاندىرۋشى. كوپ جاعدايدا ىنتالاندىرۋشى قىزمەت ەسكەرۋسىز قالادى. ال ونىڭ باستى ماقساتى – ەل ەكونوميكاسىن دامىتۋ.

بىرقاتار دايەكتەردى مىسالعا كەلتىرۋگە بولادى. ماسەلەن، ەلىمىزدىڭ تۇتاس اۋىلشارۋاشىلىق سالاسى، سونىڭ ىشىندە ءىرى اگروحولدينگتەر بارلىق سالىقتاردى قوسا العاندا جىلىنا شامامەن بار-جوعى 50 ملرد تەڭگە سالىق تولەيدى. بۇل ەلىمىزدىڭ بيۋدجەتىنە تۇسەتىن بارلىق سالىق تۇسىمدەرىنىڭ ءنول ءبۇتىن وننان بەس پايىزىنا دا جەتپەيدى. ءبىزدىڭ ويىمىزشا، ەل ەكونوميكاسى مۇنداي سالىق جەتىسپەۋشىلىگىن كوتەرە الادى. ال ءدال وسى سالىقتان بوساتۋ شاراسى اۋىل شارۋشىلىعىنىڭ تۇراقتى دامۋىنا جانە سول ارقىلى شىعىنداردىڭ كىرىس رەتىندە مەملەكەتتىك قازىناعا ەسەلەنىپ قايتۋىنا وڭ ىقپال ەتەدى دەپ ەسەپتەيمىز.

سوڭعى ءۇش جىلدىڭ ىشىندە اۋىل شارۋاشىلىعى تاۋارلارىن وندىرۋشىلەر وسى ماسەلەمەن اينالىساتىن قۇزىرلى ورگاندارعا 200-دەن استام ءوتىنىش تىلەكتەر جولداعان ەكەن.

اۋىل شارۋاشىلىعى تاۋارلارىن وندىرۋشىلەردىڭ تاسى ورگە دومالاسا، اۋىلداردىڭ دا تىرشىلىگى كەڭگە قانات جايادى.

قۇرمەتتى ءاليحان اسحانۇلى، جوعارىدا باياندالعان ماسەلەنىڭ ءتيىستى مەملەكەتتىك ورگاندار تاراپىنان قاراستىرىلۋىنا جانە شەشىم قابىلدانۋىنا ىقپال جاساۋىڭىزدى سۇرايمىز.

قۇرمەتپەن،

«اۋىل» پارتياسى فراكتسياسىنىڭ دەپۋتاتتارى

ق. ابدەن

ە.ساۋرىقوۆ

س.ەگىزباەۆ

ج.دايراباەۆ

ن.ارسيۋتين

ت.سەرىكوۆ 

ا.باققوجاەۆ

ا.زەينۋللين

دەپۋتاتتىق ساۋالدىڭ تولىق ءماتىنى

قر پرەمەر-ءمينيسترى ا.سمايلوۆقا جولدانادى

Abai.kz