بۇگىن جاڭاوزەندە قالانىڭ مۇناي ءوندىرۋشى جانە مۇناي سەرۆيس كاسىپورىندارىنىڭ قىزمەتىن تالداۋ ماقساتىندا «قازمۇنايگاز» قىزمەتكەرلەرىنەن قۇرىلعان ارنايى جۇمىس توبى ءوز جۇمىسىنا كىرىسەدى، دەپ حابارلايدى BAQ.KZ.

قۇرامىنا 33 مامان كىرگەن توپقا قمگ باسقارما توراعاسىنىڭ ورىنباسارى داۋلەتجان حاسانوۆ جەتەكشىلىك ەتەدى.

كەشە قمگ باسقارما توراعاسى ماعزۇم مىرزاعاليەۆ استانادا ارنايى توپ قاتىسۋشىلارىمەن كەزدەسۋ وتكىزدى. ولارعا قالانىڭ ەڭبەك ۇجىمدارىمەن كەزدەسۋ وتكىزۋ، جۇمىسشىلاردىڭ ەڭبەك جاعدايىمەن، ساتىپ الۋ قىزمەتىمەن جانە كاسىپورىندار جۇمىسىنىڭ باسقا دا تۇستارىمەن تانىسۋ مىندەتتەرى قويىلدى. جەرگىلىكتى كومپانيالار قىزمەتكەرلەرىنىڭ كەلىسىمشارت تالاپتارىنىڭ بۇزىلعانى جونىندەگى شاعىمدارى، سونىڭ ىشىندە استانادا وتكەن ارنايى كوميسسيا جۇمىسى كەزىندە «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرى مالىمدەگەن شاعىمدار جەكە قارالاتىن بولادى، - دەلىنگەن قمگ تاراتقان حابارلامادا.
بۇدان باسقا، كاسىپورىنداردىڭ قىزمەت تۇرلەرىن ساتىپ الۋ راسىمدەرىندە سىبايلاس جەمقورلىق قاۋپىن انىقتاۋ مەن جولىن كەسۋگە ەرەكشە نازار اۋدارىلادى.

جۇمىس كوميسسياسى ۇسىنعان تالداۋ قورىتىندىسى بويىنشا ەكونوميكالىق جانە الەۋمەتتىك سيپاتتاعى وزەكتى ماسەلەلەردى شەشۋگە ارنالعان ءىس-قيمىل جوسپارى جاساقتالادى.

Abai.kz