الماتى 10 بالدىق جەر سىلكىنىسى بولۋى ىقتيمال سەيسميكالىق قاۋىپتى ايماقتا ورنالاسقان. بۇل تۋرالى ءماسليحاتتىڭ كەزەكتەن تىس II سەسسياسىندا قالا اكىمىنىڭ ورىنباسارى اسقار ءامرين ايتتى.

سپيكەردىڭ سوزىنشە، الماتىدا جىلىنا 300-گە جۋىق جەراستى دۇمپۋلەرى بولادى. جىل باسىنان بەرى 44 جەر سىلكىنىسى تىركەلدى. ونىڭ ۇشەۋى قالا تۇرعىندارىنا سەزىلدى. مەگاپوليستە 1116 عيمارات تەكتونيكالىق جارىقتا ورنالاسقان. ونىڭ 754-ءى سەيسميكالىق ءتوزىمدى، 362- ءسى سەيسميكالىق ءتوزىمدى ەمەس.
ايتۋىنشا، تەكتونيكالىق پروتسەستەردىڭ بەلسەندىلىگى عيماراتتاردىڭ جەر سىلكىنىسىنە توزىمدىلىك نورمالارىنا اسەر ەتەدى.
«وسىعان بايلانىستى 15 مىڭ ازاماتتىق جانە قوعامدىق عيماراتتاردى، 1600-دەن استام كوپقاباتتى تۇرعىن ۇيلەردى پاسپورتتاۋعا جەرگىلىكتى بيۋدجەتتەن 2 ملرد تەڭگە ءبولۋ جوسپارلانىپ وتىر»، - دەدى اسقار ءامرين الماتى قالاسى ءماسليحاتىنىڭ كەزەكتەن تىس VIII شاقىرىلىمىنىڭ ەكىنشى سەسسياسىندا.
بۇعان دەيىن ەربولات دوساەۆ عيماراتتارعا سەيسميكالىق اۋديت جۇرگىزىلەتىنى تۋرالى ايتقان ەدى.

سونداي-اق، ول كەشە بوستاندىق اۋدانى تۇرعىندارىمەن كەزدەسۋى كەزىندە الماتىدا ءار ءۇيدىڭ كىرەبەرىسىنە جەر سىلكىنىسى كەزىندە ەۆاكۋاتسيالاناتىن ورىننىڭ كارتاسى ىلىنەتىنىن مالىمدەدى.
ەسكە سالايىق، قر توتەنشە جاعدايلار مينيسترلىگى سەيسمولوگيا ينستيتۋتى ديرەكتورىنىڭ عىلىم جونىندەگى ورىنباسارى، فيزيكا-ماتەماتيكا عىلىمدارىنىڭ كانديداتى نۇرسارسەن وزبەكوۆ الماتىداعى جەر سىلكىنىسىنە قاتىستى بولجام ايتقان.
مامانىڭ سوزىنشە 2023 جىلى الماتىدا جەتى بالدان اساتىن جويقىن جەر سىلكىنىسى بولمايدى.

Abai.kz