جىل باسىنان بەرى رەسپۋبليكادا 4 مىڭنان استام ينتەرنەت-الاياقتىق تىركەلگەن، دەپ حابارلايدى Ulysmedia.kz.

بۇل تۋرالى ءباسپاسوز ءماسليحاتىندا ءىىم كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي ءمالىم ەتتى.

«قوعامدى تسيفرلاندىرۋدىڭ قانشالىقتى ماڭىزدى ەكەنىن ءبارىمىز بىلەمىز. قازىر ونلاين-رەجيمدە مەملەكەتتىك، سونداي-اق بانكتىك جانە وزگە دە قىزمەتتەردى الۋعا بولادى. وكىنىشكە وراي مۇنى قىلمىسكەرلەر، اتاپ ايتقاندا الاياقتار دا بەلسەندى قولدانادى. وسى جىلدىڭ ءۇش ايىندا 4 مىڭنان اسا ينتەرنەت-الاياقتىق تىركەلدى. الاياقتاردىڭ ارەكەتى سالدارىنان ازاماتتارعا 3 ملرد تەڭگەدەن استام شىعىن كەلدى»، - دەدى ورتالىق باستىعى.

ونىڭ سوزىنشە، ينتەرنەت-الاياقتىقتىڭ ەڭ كوپ تاراعان ءتاسىلى – ونلاين ساۋدا. ول ءۇشىن بەلگىلى ساۋدا الاڭدارىنىڭ سايتتارىندا، سونداي-اق الەۋمەتتىك جەلىلەر مەن مەسسەندجەرلەردە جارنامالار ورنالاستىرىلادى.

«الاياقتار تاۋاردىڭ نەمەسە قىزمەتتىڭ تومەن باعاسىن كورسەتىپ، الدىن الا تولەمدى نەمەسە تولىق تولەمدى سۇرايدى. بيىل وسىنداي 2 مىڭنان اسا قىلمىس تىركەلدى»، - دەدى ج. ءسۇيىنباي.

Abai.kz