بۇگىن ءماجىلىس دەپۋتاتى جيگۋلي دايراباەۆ Facebook-تەگى پاراقشاسىنا ءىستى بولىپ جاتقان ۇلدارىنا قاتىستى ارنايى جازبا جاريالادى. ونىڭ ايتۋىنشا، قازىر ماسەلەنىڭ انىق-قانىعىنا كوز جەتكىزبەي جاتىپ، ءوزىن سىرتتاي قارالاۋشىلار كوبەيگەن، دەپ جازدى halyq-uni.

قازىرگى ۋاقىتتا كوپتەگەن بلوگەر، جۋرناليست، ساياساتتانۋشى، ايتەۋىر بارلىق سالانى بىلگىش مامانىسىماقتار كوبەيىپ كەتكەنى بايقالادى. ءبىر ماسەلەنى تولىقتاي جان-جاقتى زەردەلەمەي، شىندىققا كوز جەتكىزبەي، حايپ قۋىپ، شىندىققا ساي كەلمەيتىن سوزدەردى ايتىپ، عالامتور جەلىسىنە جاريالاپ، تاراتىپ، بەينەتۇسىرىلىم جاساپ، اقشاعا تاپسىرىس بەرىپ، بىرەۋگە قارسى ەل الدىندا قارالاۋ نەمەسە سول تۋرالى تولىق ەمەس بىرجاقتى ماعلۇمات بەرۋ ءبىر ترەندكە اينالعان سەكىلدى. بۇل – ەلدىڭ، قوعامنىڭ بولاشاعى ءۇشىن وكىنىشتى جاعداي! - دەپ كەيىستىك تانىتتى دەپۋتات.

سونداي-اق ول ەشكىمنەن جاسىرىنباي، ءوزىنىڭ بالالارىنا قاتىستى جاۋاپ بەرگەنىن العا تارتتى.

ولار – ءوز-وزدەرىنە جاۋاپ بەرە الاتىن ازاماتتار. جۇمىستارىن ادال ىستەپ، مەملەكەتتەن كومەك الىپ، حالىققا جۇمىس ورنىن بەرىپ جۇرگەن كاسىپكەرلەر. ولار وزدەرىن زاڭناما تالاپتارىنا ساي قورعاۋعا قۇقىلى جانە مەملەكەت الدىندا كاسىبي ءىس-ارەكەتتەرىنىڭ ادالدىعىن دالەلدەۋ ءۇشىن كۇرەسەتىن بولادى.

ودان بولەك، ماعان دا جالا جاۋىپ، قارالاۋ ماقساتىندا، كەيبىر ومىرگە وكپەلى ازاماتتار ىشىندەگى بۇكىل قارالىعىن شىعارىپ جاتقانىن ەستىدىم. مەن ىستەمەگەندى ىستەدى دەپ، سويلەمەگەندى سويلەدى دەپ جالعان وسەك تاراتۋشىلارعا تەك جانىم اشيدى. ولارعا تەك جانىمىز اشۋ كەرەك، ويتكەنى جالا جابۋ، بىرەۋدى ارتىنان جامانداۋ – وتە اۋىر كۇنا جانە ارسىز، ابىرويسىزداردىڭ ءىسى!» - دەدى جيگۋلي دايراباەۆ.

ايتۋىنشا، ول رامازان ايىندا ورازا ۇستاپ، «تاقۋالىققا، ءدىندى تەرەڭ زەرتتەۋگە بەت بۇرىپ»، ءبىراز سۇراقتارعا جاۋاپ بەرە الماعان كورىنەدى. سونى جۇرتتىڭ «السىزدىك نەمەسە كىناسى بار شىعار دەپ ويلاپ قالعانىنا» رەنجىپ قالىپتى دەپۋتات. اللا مەن ادام الدىندا ارىنىڭ تازا ەكەنىن جەتكىزۋ ماقساتىندا ءارى بارلىق سۇراققا جاۋاپ رەتىندە ارنايى وسى پوستتى جازايىن دەپ شەشكەن ەكەن.

Abai.kz