ايەلدەر تەننيسى قاۋىمداستىعىنىڭ (WTA) live رەيتينگىندە ە.رىباكينا جەتىنشىدەن التىنشى ورىنعا كوتەرىلدى.

بۇعان دەيىن دۇنيەجۇزىلىك رەيتينگتە 4-ساتىدا تۇرعان تۋنيس وكىلى ونس جابەر جاراقاتىنا بايلانىستى يسپانيا استاناسى مادريدتە ءوتىپ جاتقان WTA 1000 تۋرنيرىنە قاتىسۋدان باس تارتتى.

«مەديتسينالىق تەكسەرۋ مەنىڭ جىلىنشىگىمدە جاراقات بار ەكەندىگىن كورسەتتى، سوندىقتان قالپىما كەلۋ ءۇشىن ۋاقىت كەرەك. سوندىقتان، وكىنىشكە قاراي، مادريدتەگى بيىلعى تۋرنيردە ونەر كورسەتپەيمىن. ءوز تيتۋلىمدى قورعاي المايمىن»، دەپ جازدى جابەر الەۋمەتتىك جەلىدە.

مادريد جارىسىنىڭ وتكەن جىلعى چەمپيونى و.جابەر بيىل سول اتاعىن قورعاۋعا ءتيىس بولاتىن. سوندىقتان ول دودا بىتكەننەن كەيىن 1 مىڭ رەيتينگىلىك ۇپايىنان ايىرىلادى.

تۋنيستىك تەننيسشى وتكەن اپتادا شتۋتگارت WTA 500 جارىسىنىڭ جارتىلاي فينالىنا دەيىن جەتىپ، وندا 20 مينۋتتاي ويناپ، جاراقاتى سالدارىنان ماتچتى جالعاستىرا الماعان ەدى.

ە.رىباكينانىڭ مادريدتە تابىستى ونەر كورسەتسە، الەمدىك رەيتينگىدە بۇدان دا جوعارىلاۋىنا مۇمكىندىگى بار.

ەسكە سالا كەتەيىك، بۇدان بۇرىن ەلەنا رىباكينانىڭ مادريد ماستەرس تۋرنيرىندە باق سىنايتىنىن جازعان بولاتىنبىز.

سونداي-اق قازاقستاندىق تەننيسشى مادريد ءتۋرنيرىنىڭ ىرىكتەۋ سايىسىندا جەڭىلىپ قالدى.

Abai.kz