قازاقستاندىقتاردى ازىق-تۇلىك ونىمدەرىمەن قامتاماسىز ەتۋدىڭ تولىق مۇمكىندىگى بار، بىراق ونى ساقتاۋ ماسەلەسى تۋىنداپ وتىر. بۇل تۋرالى پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ايتتى. 

«بۇگىندە قويمالاردا 2 ملن توننا ازىق-تۇلىك قورىن ساقتاۋ مۇمكىندىگىمىز بار. ونىڭ ىشىندە 1 ملن توننا ازىق-تۇلىك ساقتالعان قويمادا كليماتتىق باقىلاۋ ورناتىلعان. بىزگە تاعى 1 ملن توننا ازىق-تۇلىك قورىن ساقتايتىن قويما قاجەت. بيىل 335 مىڭ توننا ونىمگە ارنالعان قويما سالامىز. قالعان 600 مىڭ توننادان استام ءونىم ساقتايتىن قويما بويىنشا باعدارلاما ازىرلەنىپ جاتىر. جالپى، بۇل باعىتتا كەشەندى جوسپار بار. بىزدە تۇرعىنداردى ازىق-تۇلىك، جەمىس-جيدەك جانە كوكونىسپەن قامتۋدىڭ تولىق مۇمكىندىگى بار، بىراق ونى ساقتاي المايمىز»، - دەدى سەرىك جۇمانعارين ۇكىمەت وتىرىسىنان كەيىن باق وكىلدەرىنىڭ ساۋالىنا جاۋاپ بەرە تۇرىپ.

ساۋدا ءمينيسترىنىڭ ايتۋىنشا ازىق-تۇلىك قورىن ساقتاۋ، اسىرەسە ءساۋىر، مامىر ايلارىندا ماڭىزعا يە.

سونداي-اق، كليماتتىق باقىلاۋ جوق قويمالاردا ءونىمدى ساقتاۋدىڭ قيىنعا تۇسەتىنىن ايتتى.

ەسكە سالساق، سەرىك جۇمانعارين ءساۋىردىڭ باسىندا كەلەر جىلعا ازىق-تۇلىك رەزەرۆىن ساتىپ الۋ باستالعانى تۋرالى مالىمدەگەن ەدى.

Abai.kz