سانكتسيالىق تاۋارلاردىڭ قازاقستان ارقىلى رەسەيگە جەتكىزىلىپ جاتقانى – اقش-تىڭ سانكتسيالارى مەن ەكسپورتتىق باقىلاۋ شارالارىن تىكەلەي بۇزۋ بولىپ ەسەپتەلەدى. وسىلاي دەپ قۇراما شتاتتاردىڭ ساۋدا مينيسترلىگىنىڭ وكىلى مەتتيۋ اكسەلرود استانادا جۋرناليستەرمەن كەزدەسكەن كەزدە ايتتى.  

ونىڭ سوزىنشە، ۋكراينادا سوعىس باستالعاننان كەيىن بىرقاتار تاۋاردىڭ قازاقستانعا، ودان ءارى رەسەيگە ەكسپورتتاۋ كۇرت وسكەن.

ء"بىز قازىر ايفوندور نەمەسە كىر جۋاتىن ماشينالار تۋرالى ايتىپ جاتقان جوقپىز. ماسەلە ۋكراينا ايماعىندا بەيبىت تۇرعىندار مەن اسكەريلەردى بومبالاۋ ءۇشىن قولدانىلىپ جاتقان زىمىرانداردى جانە درونداردى جاساۋدا پايدالانىلاتىن ەلەكتروندىق كومپونەنتتەر تۋرالى بولىپ جاتىر", - دەدى اكسەلرود.

قازىر اقش بيلىگى ءبىرىنشى كەزەكتە زىمىراندار مەن دروندار ءۇشىن قاجەت ەلەكتروندىق سحەمالار، كومپيۋتەرلىك چيپتەر سەكىلدى تاۋارلارعا ءمان بەرىپ جاتىر.

ء"بىز بۇل بويىنشا قازاق ۇكىمەتىنىڭ جانە ونەركاسىپ وكىلدەرىمەن سويلەسىپ جاتىرمىز. وسىعان دەيىنگى كەزدەسۋلەردىڭ قورىتىندىسى بويىنشا قازاق تاراپ ءبىزدى ءتۇسىنىپ، تولىق قولداۋعا دايىن دەپ ايتا الامىن. اقش، ۇلىبريتانيا، ەۋروپا وداعى جانە باسقا ەلدەردىڭ وكىلدەرى بۇل كومپونەنتتەردىڭ رەسەيگە جەتكىزىلۋىن توقتاتۋعا تىرىسىپ جاتقان ارەكەتىنىڭ ناتيجەسىن كورەدى دەپ سەنەمىن", - دەدى ول.

اكسەلرودتىڭ سوزىنشە، وسى اپتادا اقش-تىڭ قارجى مينيسترلىگىنىڭ كومەكشىسى ەليزابەت روزەنبەرگپەن بىرگە ورتالىق ازيانىڭ باسقا ەلدەرىنە، ونىڭ ىشىندە قىرعىزستانعا بارۋدى جوسپارلاپ جاتقانىن ايتتى.

24 ساۋىردە استاناعا بارعان ەۋروپا وداعىنىڭ سانكتسيالار بويىنشا ارنايى وكىلى تىكەلەي جانە جاناما تۇردە سوعىسقا قاجەتتى تاۋارلاردىڭ قازاقستان ارقىلى رەسەيگە جونەلتىلىپ جاتقانىن ايتقان.

قازاقستان ۋكرايناعا باسىپ كىرگەن ماسكەۋدى رەسمي تۇردە ايىپتاماعان، باتىس سانكتسياسىنا دا قوسىلماعان. بىراق سانكتسيانى اينالىپ وتەتىن جول بولمايتىنىن قۇلاعدار ەتكەن.

2023 جىلعى ناۋرىزدا Bloomberg اگەنتتىگى قازاقستان 2022 جىلى رەسەيگە قۇنى 3,7 ميلليون دوللار تۇراتىن ميكروچيپتەر مەن جارتىلاي وتكىزگىشتەر ساتقانىن انىقتاعان. بۇرىن مۇنداي تاۋار اينالىمى 12 مىڭ دوللاردان اسپاعان. قازان ايىندا Bloomberg ەۋروپا وداعىنان قازاقستانعا ەكسپورتتالاتىن سۇتساۋعىش 633 پايىز كوبەيگەنىن ايتقان.

2022 جىلى تامىزدا قازاقستان ەۋروپادان 21,4 ميلليون دوللارعا مۇزداتقىش ساتىپ العان. بۇل بۇرىنعى كەزەڭدەگىدەن ءۇش ەسە كوپ. قازاقستان ۇكىمەتىنىڭ مالىمەتتەرى دە مۇزداتقىش، كىرجۋعىش، سۇتساۋعىشتار رەسەيگە كوپتەپ كەتىپ جاتقانىن كورسەتكەن.

Abai.kz