"قازاقستان اۋعانستانمەن ەكونوميكالىق ىنتىماقتاستىقتى دامىتۋعا نەگە مۇددەلى بولىپ وتىر؟" دەگەن جۋرناليستەر سۇراعىنا بۇگىن ساۋدا ءمينيسترى سەرىك جۇمانعارين ۇكىمەت وتىرىسىنان كەيىن جاۋاپ بەردى دەپ جازادى جەرگىلىكتى بۇقارالىق اقپارات قۇرالدارى.

ء"بىز اۋعانستانمەن ىنتىماقتاستىقتامىز، ساۋدا جاسايمىز. ساۋدامىز جاقسى ءجۇرىپ جاتىر، 1 ميلليارد دوللارعا جەتتى. بۇل ازەربايجانمەن جانە تۇركىمەنستانمەن ساۋدا-ساتتىعىمىزدان دا كوپ. دەمەك، ساياسات ساياساتىمەن، ال ەكونوميكا ەكونوميكاسىمەن. ءبىز بۇل ساۋدا ىنتىماقتاستىعىن دامىتامىز. ولارعا بيداي، ۇن جانە كۇنباعىس مايىن بۇدان دا كوپ جەتكىزەتىن مۇمكىندىگىمىز بار. ودان نەگە باس تارتۋىمىز كەرەك؟" دەگەن مينيستر ءسوزىن Informburo.kzتاراتقان.

جۇمانعارين قازاقستان اۋعانستاندا ساۋدا ءۇيىن اشىپ، ساۋدا وكىلىن تاعايىنداعانىن دا ەسكە سالعان. وتكەن اپتادا قازاقستان سىرتقى ىستەر مينيسترلىگى اۋعانستاننىڭ گەرات قالاسىندا قازاقستاننىڭ ساۋدا ءۇيى اشىلعانىن حابارلاعان.

"اۋعانستان ۇلكەن ءارى الۋان ءتۇرلى. نارىقتى زەرتتەپ، جەرگىلىكتى كاسىپكەرلەرمەن تانىسۋ كەرەك. اۋعان كاسىپكەرلەرىن شاقىرىپ، بيزنەس-فورۋم وتكىزگىم كەلەدى. ولار قازاقستاندى، مۇمكىندىكتەرىمىزدى كورسىن. ازىق-تۇلىكپەن اينالىساتىنداردى عانا ەمەس، سوڭعى جولى جەر قويناۋىن پايدالانۋشىلاردى دا اپاردىق. ويتكەنى ول – جەر قويناۋىن پايدالانۋ جاعىنان ءبىرشاما باي ەل. ولار قاتتى قىزىقتى" دەيدى مينيستر.

بۇعان دەيىن باق-تا قازاقستان پرەمەر-ءمينيسترىنىڭ ورىنباسارى ءارى ساۋدا ءمينيسترى سەرىك جۇمانعاريننىڭ كابۋلدە "تاليبان" ۇكىمەتىنىڭ ۆيتسە-پرەمەرى ابدۋل-عاني بارادارمەن ەكونوميكا ماسەلەسى بويىنشا كەلىسسوز وتكىزگەنى تۋرالى اقپارات جاريالانعان.

بۇل كەزدەسۋدە تالىپتەر استاناداعى اۋعانستان ەلشىلىگىنىڭ عيماراتىن (اۋعاننىڭ بۇرىنعى بيلىگىنىڭ ديپلوماتتارى وتىرعان) سۇراعانى، قازاقستان جاعى تالىپتەر جىبەرگەن ديپلوماتتاردى قابىلداۋعا ۋادە بەرگەنى ايتىلعان. سىرتقى ىستەر مينيسترلىگى 17 ساۋىردەگى بريفينگىندە اۋعانستاننىڭ جاڭا اكىمشىلىگىنىڭ ءوتىنىشى ورىندالاتىنىن مالىمدەگەن.

قازاقستان سىرتقى ىستەر مينيسترلىگى مۇنىڭ ءبارى ء"بىز تالىپتەر ۇكىمەتىن رەسمي تۇردە مويىندادىق دەگەن ءسوز ەمەس" دەگەن بولاتىن.

"تاليبان" قوزعالىسىنا تەررور ۇيىم رەتىندە الەمنىڭ كوپ ەلىندە، سونىڭ ىشىندە قازاقستاندا دا تىيىم سالىنعان. الايدا استانا اۋعانستان بيلىگىن تالىپتەر باسىپ العان سوڭ دا كابۋلعا رەسمي دەلەگاتسياسىن جىبەرگەن، قازاقستاننىڭ كابۋلداعى ەلشىلىگى دە جۇمىسىن توقتاتپاعان. قازاقستان اۋعانستانداعى "تاليبان" ۇكىمەتىن رەسمي تۇردە مويىنداماعان، بىراق پرەزيدەنت قاسىم-جومارت توقاەۆ "گۋمانيتارلىق ماسەلەلەردى شەشۋ ءۇشىن" اۋعانستاننىڭ جاڭا بيلىگىمەن بايلانىس ورناتۋعا دايىن ەكەنىن مالىمدەگەن.

Abai.kz