قمگ ارنايى جۇمىس توبى جاڭاوزەندە جۇمىسىن جالعاستىرىپ جاتىر. كۇن سايىن قالا كاسىپورىندارىنا بارىپ، ەڭبەك ۇجىمدارىمەن كەزدەسۋلەر وتكىزىلىپ، قىزمەتكەرلەردىڭ شاعىمدارى مەن تىلەكتەرى تىڭدالادى. بۇدان باسقا، جۇمىس توبىنىڭ مۇشەلەرى قارجى-شارۋاشىلىق قىزمەت باعىتىندا ەسەپ قۇجاتتامالارىن تەكسەرەدى.

وسى ۋاقىت ارالىعىندا ونداعان بۇزۋشىلىق انىقتالدى، ولارعا الداعى ۋاقىتتا قۇقىقتىق باعا بەرىلەدى.

جۇمىس توبىنىڭ جەتەكشىسى، «قازمۇنايگاز» ۇك اق باسقارما توراعاسىنىڭ ورىنباسارى داۋلەتجان حاسانوۆ انىقتالعان كەيبىر بۇزۋشىلىقتار تۋرالى باياندادى.

د.حاسانوۆتىڭ ايتۋىنشا، «وزەنمۇنايگاز» كومپانياسىندا جۇمىس ورىندارىنا كەلمەگەن قىزمەتكەرلەردى جۇمىسقا ورنالاستىرعان فاكتىلەر انىقتالعان. وسىنداي جاعدايلاردىڭ ءبىرى، اقتاۋلىق بەلگىلى ايتىسكەر اقىن الدىمەن شتاتتا تەولوگ، كەيىننەن قوعاممەن بايلانىس جونىندەگى مامان قىزمەتىن اتقارعان.

«كومپانيا شتاتىنا كەزەكتەن تىس نەمەسە بىلىكتىلىك تالاپتارىنا سايكەس كەلمەيتىن جانە جوندەۋمەن اينالىساتىن بولىمشەلەردىڭ ماماندىقتارى بويىنشا جەتكىلىكتى جۇمىس تاجىريبەسى جوق ادامداردى جۇمىسقا قابىلداۋ فاكتىلەرى بار»، — دەپ قوستى ول.

جۇمىس توبىنىڭ جەتەكشىسى اتاپ وتكەندەي، بىرقاتار جۇك كولىكتەرىنىڭ GPS دەرەكتەرىن ۋاقىت كەستەلەرىمەن سالىستىرعان كەزدە، دەرەكتەردىڭ سايكەس كەلمەگەنى انىقتالعان. «ياعني، اۆتوموبيلدەر ناقتى ءجۇرىپ وتكەن ۋاقىت ارالىعىن تابەلدەردە اسىرا كورسەتكەن. تيىسىنشە، اتقارىلعان جۇمىس ءۇشىن تولەم دە اسىرا باعالاندى»، — دەپ اتاپ ءوتتى د.حاسانوۆ.

سونداي-اق، جۇمىس توبى مۇناي وندىرەتىن جابدىقتى جالعا الۋ قىزمەتى بىرنەشە ەسە جوعارى باعاعا كورسەتىلگەن جاعدايدى انىقتادى. وسىلايشا، سەرۆيس كورسەتەتىن كومپانيالاردىڭ ءبىرى «وزەنمۇنايگازعا» امبەباپ ەلەكتر ورتالىقتان تەپكىش سورعىنى تاۋلىگىنە ۇڭعىماعا 96 مىڭ تەڭگە باعامەن جالعا بەرگەن. وڭىردەگى باسقا مۇناي ءوندىرۋشى كومپانيانىڭ ءدال وسىنداي سورعىنى جالعا بەرۋ باعاسى بۇدان 2 ەسە ارزان، اتاپ ايتقاندا تاۋلىگىنە ۇڭعىماعا 39,7 مىڭ تەڭگە.

قمگ باسقارما توراعاسىنىڭ ورىنباسارى ساتىپ الۋ سالاسىنان تاعى ءبىر مىسال كەلتىردى. اتاپ ايتقاندا، ومگ ۇڭعىمالاردى جوندەۋگە ارنالعان 14 دانا كوتەرگىش اگرەگات ساتىپ الدى. مامىلەنىڭ جالپى سوماسى 1,5 ملرد تەڭگەدەن اسقان. جەتكىزۋ مەرزىمى — 2022 جىلدىڭ 31 جەلتوقسانى. تەكسەرۋ بارىسىندا كورسەتىلگەن مەرزىمدە 14 اگرەگاتتىڭ بىرەۋى عانا جەتكىزىلگەنى انىقتالدى. ەسەپ بەرۋ قۇجاتتاماسىندا ول جاڭا دەپ كورسەتىلگەن. الايدا، تەكسەرىس ناتيجەسىندە ونىڭ كومپونەنتتەرى الدەقاشان ەسكىرگەنى، كوپتەگەن بولشەكتەرىنىڭ جوق ەكەنى، قۋات كونسترۋكتسيالارى پايدالانۋ ءۇشىن قاۋىپتى ەكەنى انىقتالدى. مۇنى جاسىرۋ ءۇشىن توت باسقان كورپۋسى مەن ءشاسسيدىڭ مەتالل كونسترۋكتسيالارى قارا تۇسكە بويالعان.

جۇمىس توبى وندىرىستىك جانە ەكولوگيالىق قاۋىپسىزدىك نورمالارىن بۇزعان جاعدايلاردى جويۋ ءۇشىن ومگ مەن مۇناي سەرۆيس كومپانيالارىنا ۇسىنىستار مەن تاپسىرمالار بەردى. مىسالى، بىرقاتار نىساندا عيماراتتار مەن قۇرىلىستار بويىنشا جوبالاۋ قۇجاتتارى جوق، جەلدەتۋ جۇيەسى قاۋىپسىزدىك تەحنيكاسىنىڭ تالاپتارىنا سايكەس كەلمەيدى. ۇڭعىمالاردى جوندەۋ جۇمىستارى كەزىندە ەكولوگيالىق نورمالار ساقتالمايدى، ونىڭ ىشىندە ۇڭعىمالاردى جەراستى جانە كۇردەلى جوندەۋ كەزىندە قورعانىش پلەنكالارى جوق، ۇيىندىلەر قويما رەتىندە پايدالانىلادى، لاستانعان توپىراق ۋاقتىلى الىنبايدى.

د.حاسانوۆ جاڭاوزەن كاسىپورىندارى قىزمەتكەرلەرىنىڭ شاعىمدارىن تەكسەرۋ ماسەلەسىنە جەكە توقتالدى. بەلگىلى بولعانداي، ومگ-ءنىڭ كەيبىر مەردىگەر ۇيىمدارىندا زەينەتاقى اۋدارىمدارىن 2-3 ايعا كەشىكتىرگەن جاعدايلار بار، كولىك قىزمەتىن ۇسىناتىن مەردىگەر ۇيىمداردىڭ قىزمەتكەرلەرى ارنايى كيىممەن جانە تاماقپەن قامتاماسىز ەتىلمەيدى، ۇستەمە جۇمىس ۋاقىتى اسىپ كەتكەن جاعدايلار تىركەلگەن. ءاربىر اتالعان فاكتى بويىنشا ءتيىستى شارالار قابىلداناتىن بولادى.

«جالپى، جۇمىس جالعاسادى. بۇل انىقتالعان جەرگىلىكتى بۇزۋشىلىقتاردىڭ كەيبىر مىسالى عانا. جاڭا فاكتىلەر تۋرالى ءبىز جۇرتشىلىقتى حاباردار ەتىپ وتىرامىز. انىقتالعان بۇزۋشىلىقتاردىڭ ءاربىر تارماعى بويىنشا قۇقىقتىق باعا بەرىلەتىن بولادى. بارلىق جاۋاپتىلار قۇقىق بۇزۋشىلىقتاردىڭ اۋىرلىعىنا بايلانىستى جازالانادى. ءتيىستى قۇجاتتاردى قۇقىق قورعاۋ ورگاندارىنا تاپسىرامىز»، — دەپ تۇيىندەدى د.حاسانوۆ.

Abai.kz