پارلامەنت ءماجىلىسىنىڭ توراعاسى ەرلان قوشانوۆ تۇركى مەملەكەتتەرى پارلامەنتتىك اسسامبلەياسىنىڭ ءحىى پلەنارلىق وتىرىسىنا قاتىسۋ ءۇشىن تۇركياعا جۇمىس ساپارمەن باردى. ەكى كۇنگە سوزىلاتىن ساپار اياسىندا كەزدەسۋلەر وتكىزىپ، بىرقاتار ءىس-شارالارعا قاتىسۋ جوسپارلانعان.

ەرلان قوشانوۆ انكارادا تۇركيا رەسپۋبليكاسى ۇلى ۇلتتىق جينالىسىنىڭ توراعاسى مۇستافا شەنتوپپەن بىرگە قازاقستان-تۇركيا دوستىق ساياباعىنىڭ سالتاناتتى اشىلۋ راسىمىنە قاتىستى.

ءىس-شارا تۇركيا رەسپۋبليكاسىنىڭ 100 جىلدىعىمەن تۇسپا-تۇس كەلىپ وتىر. ءماجىلىس توراعاسى بارشا تۇرىك حالقىن تورقالى تويمەن قۇتتىقتاپ، باق-بەرەكە تىلەدى.

«قازاقستان مەن تۇركيا اراسىنداعى قارىم-قاتىناس كەڭەيتىلگەن ستراتەگيالىق ىنتىماقتاستىق دەڭگەيىنە جەتىپ، بارلىق سالادا قارقىندى دامىپ جاتىر. وعان، ارينە، مەملەكەتتەرىمىزدىڭ باسشىلارى قاسىم-جومارت كەمەلۇلى توقاەۆ پەن رەجەپ تايپ ەردوعاننىڭ ناتيجەلى كەلىسىمدەرىنىڭ ارقاسىندا قول جەتكىزىپ وتىرمىز. الداعى ۋاقىتتا دا ءبىز كوشباسشىلارىمىزدىڭ ەكىجاقتى ىنتىماقتاستىقتى كۇشەيتۋگە باعىتتالعان جۇمىسىن پارلامەنت دەڭگەيىندە جالعاستىراتىن بولامىز»، – دەدى ەرلان قوشانوۆ.

ءماجىلىس سپيكەرى ساياباقتىڭ اشىلۋى ءتۇبى ءبىر، مادەنيەتى مەن تاريحى ورتاق تامىرلاس ەكى ەلدىڭ دوستىعى مەن ىنتىماعىن نىعايتا تۇسەتىنىن اتاپ ءوتتى.

«قازاقتا «اعاش تامىرىمەن مىقتى، ادام دوستارىمەن مىقتى» دەگەن ءسوز بار. ءبىز تۇركيامەن دوستىعىمىزدى، باۋىرلاستىعىمىزدى جوعارى باعالايمىز. بولاشاقتا بۇل ساياباق انكارا تۇرعىندارى مەن قوناقتارى ءۇشىن اسەم دەمالىس ورنىنا اينالادى دەپ سەنەمىز»، – دەدى ءماجىلىس سپيكەرى.

ساياباق انكارانىڭ كونە تاريحي ورتالىعى – ماماك اۋدانىندا ورنالاسقان. اۋدانى 14 مىڭ شارشى مەتر.  وندا وتباسىلىق دەمالىس، جۇگىرۋ جانە دەنە شىنىقتىرۋمەن اينالىسۋ ءۇشىن بارلىق جاعداي جاسالعان. ساياباقتا كۇلتەگىن، بىلگە قاعان، تونىكوك جازبا ەسكەرتكىشتەرى ورناتىلعان. سونداي-اق قازاقتىڭ ۇلى اقىنى اباي قۇنانبايۇلىنىڭ مەن دانا فيلوسوف ءال-ءفارابيدىڭ مۇسىندەرى بار.

باۋىرلاس حالىقتارىمىزدىڭ اراسىنداعى دوستىقتى تەرەڭدەتۋ جايى ەكى ەل پارلامەنتتەرى سپيكەرلەرىنىڭ ەكەۋارا كەزدەسۋىندە دە اڭگىمەگە ارقاۋ بولدى.

ەرلان قوشانوۆ اۋەلى تۇركيادا بولعان جويقىن جەر سىلكىنىسى بارشا قازاق حالقىنىڭ قابىرعاسىن قايىستىرعانىنا توقتالىپ، كوڭىل ايتتى.

سونىمەن بىرگە الداعى ۋاقىتتا پرەزيدەنت قاسىم-جومارت توقاەۆتىڭ تاپسىرماسىمەن جەر سىلكىنىسى اۋماعىندا بىرقاتار الەۋمەتتىك عيماراتتىڭ قۇرىلىسى جوسپارلانىپ وتىرعان اتاپ ءوتتى.

ءماجىلىس توراعاسى قازاقستاننىڭ تۇركيامەن پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەنىن ايتتى.

– «بۇگىنگى كۇنگە دەيىن دوستىق توپتار مەن پارلامەنتتىك كوميتەتتەر دەڭگەيىندەگى ىقپالداستىعىمىز وڭ ناتيجە كورسەتىپ كەلدى. سوندىقتان بۇل قارقىنىمىزدى باسەندەتپەي، بەلسەندىلىك تانىتىپ، وسى باعىتتا جۇمىسىمىزدى جالعاستىرۋىمىز قاجەت. بۇل زاڭناما سالاسىندا جان-جاقتى تاجىريبە الماسۋعا مۇمكىندىك بەرەدى. ءبىز بارلىق باعىتتا بەلسەندى قىزمەت ەتۋگە دايىنبىز»، – دەدى ەرلان قوشانوۆ.

كەزدەسۋ سوڭىندا تاراپتار ءماجىلىس پەن ۇلى ۇلتتىق جينالىسى اراسىنداعى ىنتىماقتاستىق تۋرالى حاتتاماعا قول قويدى.

ءماجىلىس توراعاسىنىڭ تۇركياعا ساپارى جالعاسۋدا. 28 ساۋىردە ەرلان قوشانوۆ تۇركى مەملەكەتتەرى پارلامەنتتىك اسسامبلەياسىنىڭ كەڭەسى وتىرىسى مەن تۇركى مەملەكەتتەرى پارلامەنتتىك اسسامبلەياسىنىڭ ءحىى پلەنارلىق وتىرىسىنا قاتىسادى.

Abai.kz