قازاقتىڭ جەرى قىتايعا ساتىلا ما؟
بۇعان دەيىن الەۋمەتتىك جەلىدە «اۋىلشارۋاشىلىعىنا ارنالعان قازاقتىڭ جەرى قىتاي سايتتارىندا ساۋدالانىپ جاتىر» دەگەن اقپارات تاراعان ەدى.
جەلى بەلسەندىسى ەرلان مازان قىتايدىڭ جەر جالداۋ سايتتارىندا وسى اقپاراتتى كوزى شالىپ قالعانىن جازعان.
«ويدا جوقتا قىتايداعى جەر جالداۋ سايتىنا تاپ بولىپ، تاڭ قالدىم. الگى جەر كودەكسى ارقىلى شەتەلدىكتەرگە جالعا بەرىلمەيتىن بولىپ شەشىلگەن اۋىلشارۋاشىلىق ماقساتىنداعى قازاقتىڭ جەرى سول جەردە ارزان باعامەن اشىق ساۋداعا سالىنىپ جاتىر. بۇل ەندى بارىپ تۇرعان باسسىزدىق قوي!»، — دەپ اشۋعا بۋلىققان ەدى جەلى بەلسەندىسى.
اتالعان جايت جۇرتتىڭ نازارىنا ىلىگىپ، قازاقتىلدى ورتادا قىزۋ تالقىعا ءتۇستى. «بۇل سايتقا جارنامانى كىم سالدى؟» دەگەن ساۋال كەشەلى بەرى الەۋمەتتىك جەلىدەگى قاۋىمعا مازا بەرمەي كەلگەن-ءدى.
ارتىنشا وسى جونىندە كوميتەت توراعاسى مۇرات تەمىرجانوۆ جەلىدەگى جۇرتقا جاۋاپ قاتىپ، ءۇشبۋ اقپاراتتىڭ جالعان ەكەنىن مالىمدەدى.
«جەر كودەكسىنىڭ 24-بابىنىڭ تالاپتارىنا سايكەس، شەتەلدىكتەر، ازاماتتىعى جوق ادامدار، شەتەلدىك زاڭدى تۇلعالار، شەتەلدىك قاتىسۋى بار قازاقستان رەسپۋبليكاسىنىڭ زاڭدى تۇلعالارى، حالىقارالىق ۇيىمدار، حالىقارالىق قاتىسۋى بار عىلىمي ورتالىقتار، سونداي-اق قانداستار اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك نەمەسە جەر پايدالانۋ قۇقىعىمەن يەلەنە المايدى، ياعني اۋىل شارۋاشىلىعى ماقساتىنداعى جەر ۋچاسكەلەرiن شەتەلدىكتەرگە بەرۋگە قاتاڭ تىيىم سالىنعانىن اتاپ وتەمىز.
سونىمەن قاتار، اۋىل شارۋاشىلىعى ماقساتىنداعى جەر ۋچاسكەلەرىن شەتەلدىكتەرمەن نەمەسە ازاماتتىعى جوق ادامدارمەن نەكەدە تۇرعان (ەرلى-زايىپتى) قازاقستان رەسپۋبليكاسىنىڭ ازاماتتارىنا جەكە مەنشىككە جانە جەر پايدالانۋ قۇقىعىمەن بەرۋگە جول بەرىلمەيدى.
الەۋمەتتىك جەلىدە جاريالانعان قىتاي ەلىنىڭ سايتىنداعى قازاقستان اۋماعىنداعى جەرلەردىڭ ساتىلاتىنى تۋرالى اقپاراتتىڭ جالعان ەكەنىن مالىمدەيمىز»، – دەپ حابارلادى كوميتەتى باسشىسى.
مۇرات تەمىرجانوۆتىڭ اتاپ وتكەنىندەي اتالعان زاڭ نورمالارىن بۇزۋ دەرەكتەرى انىقتالعان جاعدايدا ولارعا جول بەرگەن سۋبەكتىلەر زاڭناما تالاپتارىنا سايكەس جاۋاپقا تارتىلادى. بۇل ماسەلە اۋىل شارۋاشىلىعى مينيسترلىگىنىڭ ءجىتى باقىلاۋىندا.
ايتا كەتەلىك، اتىشۋلى جازباعا پىكىر بىلدىرگەن تانىمال ساياساتكەر مۇحتار تايجان دا ءوز سوزىندە زاڭعا سۇيەنگەن بولاتىن. «زاڭدا بۇنداي مۇمكىندىك جوق» دەدى جەر كودەكسىنىڭ 24-ءشى بابىن تىلگە تيەك ەتكەن ساياساتكەر.
Abai.kz
