قازاقستان نەگىزگى ازىق-تۇلىك ونىمدەرىمەن ىشكى نارىقتى 100%-عا دەيىن قامتاماسىز ەتەدى

اگروونەركاسىپ كەشەنىندەگى ينۆەستيتسيالىق جانە تەحنولوگيالىق شارالار ىشكى نارىقتى ازىق-تۇلىكپەن قامتاماسىز ەتۋگە تىكەلەي ىقپال ەتەدى.

2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قازاقستاندا ازىق-تۇلىك ونىمدەرى ءوندىرىسىنىڭ ناقتى كولەم يندەكسى 114,7%-دى، ال سۋسىندار ءوندىرىسى 104,4%-دى قۇرادى.

ءوندىرىس كولەمىنىڭ ءوسۋى ەت، شۇجىق ونىمدەرى، وسىمدىك جانە سارى ماي، ىرىمشىك پەن سۇزبە، قىشقىل ءسۇت ونىمدەرى، جارمالار، ماكارون ونىمدەرى، كۇرىش، كونديتەرلىك ونىمدەر جانە وڭدەلگەن كوكونىستەر سياقتى نەگىزگى ساناتتار بويىنشا تىركەلدى.

قازىرگى تاڭدا قازاقستاننىڭ ىشكى نارىعى نەگىزگى ازىق-تۇلىك ونىمدەرى بويىنشا 80–100% كولەمىندە وتاندىق ونىممەن قامتاماسىز ەتىلگەن. ءوز ءوندىرىسىنىڭ كولەمىن ارتتىرۋ ىشكى نارىقتاعى باعانى تۇراقتاندىرۋعا جانە يمپورتقا تاۋەلدىلىكتى ازايتۋعا مۇمكىندىك بەرەدى.

سونىمەن قاتار يمپورتتى تولىق الماستىرۋ باعىتىنداعى جۇيەلى جۇمىس ءالى دە سىرتقى جەتكىزىلىمگە تاۋەلدى بولىپ وتىرعان التى سانات بويىنشا جالعاسۋدا. ولار: قۇس ەتى، بالىق، شۇجىق ونىمدەرى، ىرىمشىك، قانت جانە الما. جاڭا وتاندىق كاسىپورىنداردىڭ ىسكە قوسىلۋى وسى ونىمدەر بويىنشا يمپورتقا تاۋەلدىلىكتى كەزەڭ-كەزەڭىمەن قىسقارتىپ، نەگىزگى ازىق-تۇلىك سەبەتىنىڭ قۇنىن تۇراقتاندىرۋعا ىقپال ەتەدى.

باعانى تۇراقتاندىرۋ جانە الىپساتارلىق ۇستەمەاقىلاردىڭ الدىن الۋ ماقساتىندا ۇكىمەت ءىرى ساۋدا جەلىلەرىمەن تىكەلەي جۇمىس كەزدەسۋلەرىن وتكىزىپ، وڭىرلەردە تۇراقتى تۇردە فەرمەرلىك جارمەڭكەلەر ۇيىمداستىرادى. بۇل جارمەڭكەلەردە ونىمدەر وندىرۋشىلەردەن تىكەلەي ساتىلىپ، باعاسى نارىقتاعىدان 15–20%-عا تومەن بولادى.

Abai.kz