جۇما, 29 ناۋرىز 2024
بيلىك 3046 22 پىكىر 29 مامىر, 2023 ساعات 16:39

ەۋروپا قازاقتارى پرەزيدەنتكە حات جولدادى

جۋىردا گەرمانيانىڭ كولن قالاسىندا ەۋروپا قازاقتارىنىڭ كەزەكتى قۇرىلتايى (2023 جىلعى قۇرىلتاي) ءوتتى. بۇل تۋرالى دانيا مەملەكەتىندە تۇرىپ جاتقان ەتنيكالىق قازاق، ەكونوميكا عىلىمىنىڭ كانديداتى قاجى اكبار ايۋبي الەۋمەتتىك جەلىدە حابارلادى.

«ەۋروپا قازاقتارىنا كوڭىل ءبولىپ، پرەزيدەنت كەڭەسشىسى دە كەلىپتى. بۇگىنگى قازاقستاننان ءۇمىتىمىز كەسىلسە دە «جاڭا قازاقستانعا» ءبىر شانس بەرىپ، توقاەۆ مىرزاعا وتانداستار قورى ارقالى 6 وتىنىشتە جولدادىق»، - دەپ جازدى ايۋبي مىرزا.

ءبىز اتالعان ءۇشبۋ حاتتى Abai.kz وقىرماندارىنىڭ تالقىسىنا ۇسىنعاندى ءجون سانادىق.


ەۋروپا قازاقتارىنىڭ پرەزيدەنت توقاەۆقا ءۇشبۋ حاتى

قازاقستان رەسپۋبليكاسىنىڭ

پرەزيدەنتى ق-ج.توقاەۆقا

قۇرمەتى قاسىم-جومارت كەمەلۇلى!

ءبىز ەۋروپادا جاساپ جاتقان ءبىر قاۋىم قازاقتار، وزىڭىزگە وسىنداعى اعايىننىڭ سالەمىن جولداپ، ريزاشىلىعىمىزدى بىلدىرمەك ماقساتتا قولىمىزعا قالام الدىق. ءسىزدىڭ اتاجۇرتتان جىراقتاعى ءبىزدى ەلەپ-ەسكەرىپ، المانيانىڭ كولن قالاسىندا وتكەن ەۋروپا قازاقتارىنىڭ ءداستۇرلى قۇرىلتايىنا كەڭەسشىڭىز مالىك وتارباەۆ مىرزانى ارنايى جىبەرىپ، قۇتتىقتاۋ جولداعانىڭىز ءۇشىن قۋانىپ قالدىق. ارتىمىزدا ارقا سۇيەر اسقار تاۋداي قالىڭ ەلىمىز بارىن سەزىندىك. بۇل پرەزيدەنتتىڭ شەتتەگى قازاققا دەگەن ىستىق ىقىلاسى مەن اقەدىل كوڭىلى دەپ تۇسىندىك. وسى ءۇشىن سىزگە ايتار العىسىمىز شەكسىز.

قازاق – قايدا جۇرسە دە قازاق. اتامەكەننەن الىستا جۇرسە دە جۇرەگىمىز قازاق دەپ سوعادى. قانىمىز دا، جانىمىز دا قازاق بولعان سوڭ انا ءتىلىمىزدى، اتا سالتىمىزدى ساقتاپ قالۋ – بار ماقساتىمىز. ايتسە دە، ورتانىڭ اسەرى ۇلكەن. جاستارىمىزدى وزىنە ىلەستىرىپ بارا جاتقانى جاسىرىن ەمەس.

سوندىقتان وسى مۇمكىندىكتى پايدالانا وتىرىپ، ەۋروپا قازاقتارى اتىنان تومەندەگى ماسەلەلەردى وزىڭىزگە جەتكىزگىمىز كەلەدى.

1. شەتتەگى ەتنيكالىق قازاقتاردىڭ اتاجۇرتىمىزعا ۆيزاسىز بولماسا دا، ونى الۋ راسىمدەرىن جەڭىلدەتۋگە بارىنشا مۇمكىندىك جاسالسا. ءبىزدىڭ باسقا شەتەلدىك ازاماتتاردان كىشىگىرىم بولسا دا ارتىقشىلىعىمىز بولسا.

2. 10 جىلعا بەرىلەتىن اتاجۇرت كارتاسىنىڭ تەك قانا بەلگىلى ماماندىق يەلەرىنە عانا ەمەس، ءاربىر قازاققا بەرىلۋى.

3. قازاقستاندا دۇنيەجۇزى قازاق جاستارىنىڭ ءوز قۇربى-قۇرداستارىمەن ورتاق جوبالاردا تابىستىراتىن جوعارعى دەڭگەيدەگى فورۋم وتكىزۋ.

4. ءوزىنىڭ ەتنيكالىق قازاق ەكەنىن دالەلدەي الماي، اتاجۇرتقا كوشكىسى كەلىپ جۇرگەن اۋعانىستان، يران، پاكىستان سياقتى ەلدەردەگى قازاقتارعا كوڭىل ءبولۋ.

5. قازاقستاندا بولاتىن ءتۇرلى ءىس-شارالارعا شەتتەگى قازاق بەلسەندىلەرىن دە ۇمىتپاي شاقىرىپ وتىرساڭىزدار. وسى رەتتە ءسىزدىڭ ۇلتتىق قۇرىلتاي باستاماڭىزدان دا ورىن العىمىز كەلەدى.

6. قازاقستاننىڭ ەلشىلىكتەرى مەن وتانداستار قورىنىڭ جۇمىسى جانە جوبالارى ارقىلى ەلىمىزدىڭ ناقتى قولداۋىن سەزىپ تە، كورىپ تە كەلەمىز. بۇل رەتتە، وسى ۇيىمنىڭ الەۋەتى مەن كۇشى ارتتىرىلسا، ءبىز دە، ەشكىمگە كىرىپتار بولماي، قازاقتىڭ باسىن ءوزىنىڭ جاڭا قازاقستان قۇرۋ يدەياسى توڭىرەگىندە توپتاستىرىپ، شەتتەگى بەلسەندىلىگىمىز ارتار ەدى.

ءبىزدىڭ وسى ماسەلەلەرىمىزگە كوڭىل اۋدارىپ، شەشەتىنىڭىزگە سەنەمىز. ءاردايىم قازاق ەلىنىڭ ءار باسقان قادامىن سىرتتان باقىلاپ، تىلەۋلەس بولىپ جۇرەمىز. جاقسىلىعىنا ءسۇيىنىپ، اماندىعىن، دامۋىن تىلەپ وتىرامىز. ءسىزدىڭ ادىلەتتى قازاقستان قۇرۋ ماقسات-مۇراتىڭىز بەن رەفورمالارىڭىزدى قولدايمىز. قازاق ەلىنىڭ دەموكراتياسىن ورىستەتىپ، ەكونوميكاسىن دامىتۋمەن قاتار ۇلتتىق قۇندىلىقتارىنا ەرەكشە ءمان بەرىپ، قازاق ءتىلى مەن قازاق مادەنيەتى وركەندەگەن ەل بولعانىن قالايمىز. ءسىزدىڭ باستامالارىڭىز وسىعان جەتكىزەتىنىنە سەنەمىز.

قۇرمەتپەن،

ەۋروپا قازاق ۇيىمدارىنىڭ جەتەكشىلەرى

Abai.kz

22 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616