بۇگىن الماتىنىڭ بوستاندىق اۋدانىنىڭ اكىمى ازامات قالدىبەكوۆ بۇقارالىق اقپارات قۇرالدارى مەن قالالىق مەديا قاۋىمداستىق وكىلدەرىمەن كەزدەسىپ، اۋداننىڭ الداعى دامۋ جوسپارلارىن تانىستىردى. كەزدەسۋlە ينجەنەرلىك ينفراقۇرىلىم، جول جوندەۋ، اباتتاندىرۋ، قوعامدىق كەڭىستىكتەر مەن تۇرعىندارعا قولايلى ورتا قالىپتاستىرۋ ماسەلەلەرى ءسوز بولدى. 

اۋداننىڭ دامۋ جوسپارىنا سايكەس، ەكونوميكاعا 184,1 ملرد تەڭگە ينۆەستيتسيا تارتۋ كوزدەلگەن. ونىڭ اياسىندا 99 شاقىرىم ينجەنەرلىك جەلىنى جاڭارتۋ جوسپارلانىپ وتىر. ونىڭ 66 شاقىرىمى كارىز جۇيەسىنە، 33 شاقىرىمى سۋمەن جابدىقتاۋ جەلىلەرىنە تيەسىلى. 

جول ينفراقۇرىلىمىن جاقسارتۋ باعىتىندا تۇرعىنداردان تۇسكەن 100 ءوتىنىمنىڭ ىشىنەن 30 كوشە ىرىكتەلىپ، جوندەۋ جۇمىستارى جۇرگىزىلمەك. سونىمەن قاتار 25 مىڭ شارشى مەتردەن استام اسفالت توسەلىپ، 800 اۆتوتۇراق پەن 150 ايالداما جاسالادى. اۋدان كوشەلەرىنە 2,5 مىڭعا جۋىق جاڭا جارىقتاندىرۋ شامىن ورناتۋ جانە 26 نىساندى ساۋلەتتىك جارىقتاندىرۋ جوسپارلانعان. 

تۇرعىنداردىڭ ۇسىنىستارىن ەسكەرۋگە باعىتتالعان «حالىق قاتىساتىن بيۋدجەت» باعدارلاماسى اياسىندا اۋداندا 14 جوبا ىسكە اسىرىلعان. ناتيجەسىندە 32 قوعامدىق كەڭىستىك پەن 2 اۆتوماتتى سۋارۋ جۇيەسى پايدا بولىپ، 52,15 مىڭ شارشى مەتر اۋماق اباتتاندىرىلعان. الداعى ۋاقىتتا دا اۋلالار مەن قوعامدىق ورىنداردى كوگالداندىرۋ، بالالار جانە سپورت الاڭدارىن جاڭارتۋ، جاياۋ جۇرگىنشىلەرگە قولايلى ورتا قالىپتاستىرۋ جۇمىستارى جالعاسپاق. 

بۇدان بولەك، بيزنەستىڭ الەۋمەتتىك جاۋاپكەرشىلىگى اياسىندا دۋناەۆسكي كوشەسىندە «SHUAQ» سكۆەرىن سالۋعا 600 ملن تەڭگە ينۆەستيتسيا باعىتتالعان. ال ءال-فارابي داڭعىلى بويىنداعى التى جەرۇستى جاياۋ جۇرگىنشىلەر وتكەلىن جاڭارتۋعا 100 ملن تەڭگە قاراستىرىلعان. 

ەندىگى مىندەت –جوسپارلانعان جوبالاردى ناقتى ىسكە اسىرىپ، ولاردىڭ ناتيجەسىن تۇرعىنداردىڭ كۇندەلىكتى ومىرىنەن كورسەتۋ. ويتكەنى اۋداننىڭ دامۋى ەڭ الدىمەن جاڭارعان جولدان، جارىق كوشەدەن، جايلى اۋلادان جانە قاۋىپسىز قوعامدىق كەڭىستىكتەن كورىنۋى ءتيىس. 

Abai.kz