ماسكەۋدە وتكەن ەاەو-نىڭ كەزەكتى وتىرىسىندا قازاقستان پرەزيدەنتى توقاەۆ وداق ىشىنەن وداق قۇرىپ، «ءبىر مەملەكەتكە» اينالعان رەسەي-بەلارۋسءتىڭ يدەياسىن قولدامايتىنىن ءوز سوزىندە اتاپ كورسەتتى.

«ءبىزدىڭ ويىمىز «ءبىر رەسەيدىڭ توڭىرەگىنە جينالۋ ەمەس، تەك ەكونوميكالىق ماقساتتا تەڭ قۇقىلى وداقتاس بولۋ»، - دەدى مەملەكەت باسشىسى.

«ەۋرازيالىق ەكونوميكالىق وداق شەڭبەرىندە بەلارۋس پەن رەسەيدىڭ وداقتاستاسۋى – ءمان بەرىپ، ەسكەرۋىمىز قاجەت دۇنيە.

وداقتىڭ تۇجىرىمدامالىق جانە يدەولوگيالىق نەگىزى وتە ماڭىزدى. بەلارۋس پەن ورىس حالقىنىڭ تاريحي قالىپتاسۋى، مادەني، تىلدىك، ءدىنى ورتاق. الەمدىك ساياسي تاريحتا بىرەگەي پرەتسەدەنت نەمەسە فەنومەن اتالادى. ول ورتاق ساياسي، زاڭدىق، اسكەري، ەكونوميكالىق، ۆاليۋتالىق، مادەني، گۋمانيتارلىق كەڭىستىگى بار، وداقتاس ۇكىمەتى بار، وداقتاس پارلامەنتى بار «ەكى ەل – ءبىر مەملەكەت» فورمۋلاسى بويىنشا مەملەكەتتەر. كەشىرىڭىز، ءتىپتى يادرولىق قارۋدىڭ ءوزى ەكى ەلگە ورتاق. 

بىراق ەاەو-داعى باسقا وداقتاس مەملەكەتتەر قازاقستان، قىرعىزستان جانە ارمەنيا ۇسىنعان ينتەگراتسيانىڭ ءجونى بولەك»، - دەگەن بولاتىن توقاەۆ.

وسىدان كەيىن رەسەيلىك باق-قا، «موسكۆا. كرەمل. پۋتين» باعدارلاماسىنا پىكىر ايتقان بەلارۋس باسشىسى الەكساندر لۋكاشەنكو اشىقتان-اشىق، «وداقتاس مەملەكەتكە» قوسىلۋعا شاقىردى. «بىزگە قوسىلساڭدار، يادرولىق قارۋلارىڭ بولادى»، - دەيدى ول.

«مەن قاسىم-جومارت توقاەۆ ءدال وسى ماسەلەگە قاتىستى (رەسەي مەن بەلارۋستىڭ «وداقتاس رەسپۋبليكاسىنا» - رەد.) الاڭداپ وتىر دەپ ويلامايمىن. وزدەرى ءبىلسىن. قازاقستاننىڭ وزگە مەملەكەتتەرمەن ءدال بىزدىكىندەي، رەسەي مەن بەلارۋستىكىندەي تىعىز قارىم-قاتىناسى بولۋىنە ەشكىم قارسى ەمەس. ول دەگەن وپ-وڭاي. رەسەي مەن بەلارۋستىڭ «وداعىنا» قوسىلۋ كەرەك. سوندا بارلىعىمىزدا دا يادرولىق قارۋ بولادى. بۇل مەنىڭ جەكە پىكىرىم. بۇل جالپى مۇمكىن دۇنيە دەپ ەسەپتەيمىن. ستراتەگيالىق جاعىنان ءبىزدىڭ بىرىگۋىمىزدىڭ تاپتىرماس مۇمكىندىگى تۋعانىن ءتۇسىنۋىمىز كەرەك»، - دەپتى.

ماسكەۋ ساپارىنان سوڭ اقوردانىڭ ءباسپاسوز قىزمەتى «قازاقستاننىڭ ەشقانداي ساياسي وداققا مۇشەلىككە وتۋگە نيەتتى ەمەس» ەكەنىن رەسمي مالىمدەدى.

ال پرەزيدەنت توقاەۆ بەلارۋس پرەزيدەنتى لۋكاشەنكونىڭ بۇل ءسوزىن «ءازىل» دەپ باعالادى.

«جاقىندا بەلارۋس رەسپۋبليكاسىنىڭ پرەزيدەنتى الەكساندر گريگورەۆيچ لۋكاشەنكو قازاقستانعا وداقتاس مەملەكەتكە كىرۋدى ۇسىندى. مەن ونىڭ ازىلىنە لايىقتى باعا بەردىم. بۇعان ەشبىر قاجەتتىلىك جوق.

يادرولىق قارۋعا كەلەتىن بولساق، بىزگە بۇل قارۋ قاجەت ەمەس. سەبەبى ءبىز يادرولىق قارۋدى تاراتپاۋ تۋرالى شارت پەن يادرولىق قارۋدى سىناۋعا تىيىم سالۋ تۋرالى شارتقا قوسىلدىق. ءبىز وسى حالىقارالىق قۇجاتتار اياسىنداعى مىندەتتەمەلەرگە ادال بولىپ قالا بەرەمىز»، - دەدى مەملەكەت باسشىسى.

قازاقستاندى «رەسەي-بەلورۋس وداعىنا» تارتىپ جۇرگەن لۋكوشەنكونىڭ يدەياسىن قولداۋ تۇرماق، قازاقستانعا ەندىگى ەاەو وداعىنان شىعۋدى قاراستىرعان دۇرىسىراق.

Abai.kz