قازاقستاننىڭ 7 وبلىسىندا ادامنىڭ يممۋن تاپشىلىعى ۆيرۋسىن (ايتۆ) جۇقتىرۋ كورسەتكىشى ورتاشا دەڭگەيدەن جوعارى. ۇكىمەت وتىرىسىندا بايانداما جاساعان دەنساۋلىق ساقتاۋ ءمينيسترى اجار عينيات وسىلاي ءمالىم ەتتى.

«قازاقستاندا ايتۆ ينفەكتسياسى تۇراقتى 0,3% ساتىسىندا ساقتالۋدا جانە ول ەلىمىزدىڭ بارلىق وڭىرلەرىندە تىركەلگەن. ايتا كەتۋ كەرەك، الەمدىك ورتاشا كورسەتكىش – 0,7%. ماسەلەن، 7 وبلىستا - قاراعاندى، پاۆلودار، شىعىس قازاقستان، سولتۇستىك قازاقستان، قوستاناي وبلىستارى مەن استانا جانە الماتى قالالاردا سىرقاتتانۋشىلىق ەل بويىنشا ورتاشا كورسەتكىشتەن جوعارى.

ال، جۇقتىرىلعان يممۋن تاپشىلىعى سيندرومىنان بولاتىن ءولىم-ءجىتىم 6 وبلىستا ورتاشا رەسپۋبليكالىق كورسەتكىشتەن جوعارى. ول وبلىستار –قاراعاندى، پاۆلودار، قوستاناي، سولتۇستىك قازاقستان، شىعىس قازاقستان وبلىستارى جانە الماتى قالاسى. قاراعاندى وبلىسىندا بۇل كورسەتكىش ورتاشا رەسپۋبليكالىق دەڭگەيدەن 4 ەسە ارتىق»، - دەدى اجار عينيات.

مينيستر حالىق اراسىندا وسى ينفەكتسيانىڭ پروفيلاكتيكاسى ءۇشىن ۇكىمەتتىك ەمەس ۇيىمداردىڭ الەۋەتى پايدالانىلماي وتىرعانىن ايتتى. اجار عينياتتىڭ پىكىرىنشە، ولار ەپيدەميولوگيالىق جاعدايدى تۇراقتاندىرۋدا جانە اۋرۋدىڭ جاڭا جاعدايلارىن انىقتاۋدا ماڭىزدى ءرول اتقارادى.

«تۇركىستان، اتىراۋ، قوستاناي، شىعىس قازاقستان جانە استانا، شىمكەنت قالالارىنداعى 7 ۇكىمەتتىك ەمەس ۇيىم عانا مەملەكەتتىك الەۋمەتتىك تاپسىرىس الدى. ال ەلدە 44 ۇكىمەتتىك ەمەس ۇيىمدار بار. قالعان وڭىرلەردە مەملەكەتتىك الەۋمەتتىك تاپسىرىس سوڭعى جىلدارى بولىنبەيدى، بۇل ەلدىڭ ەپيدەميولوگيالىق جاعدايىنا ىقپالىن تيگىزەتىنى ءسوزسىز»، - دەپ ماسەلە كوتەردى ول.

مينيستر مالىمدەگەندەي، سوڭعى 10 جىل ىشىندە قازاقستاندا ادامنىڭ يممۋن تاپشىلىعى ۆيرۋسىنىڭ (ايتۆ) ينفەكتسياسىمەن سىرقاتتانۋشىلىق 2 ەسەگە ارتقان.

Abai.kz