بيىل شىلدەدەن باستاپ شەت ەلدە تۇراتىن ەتنيكالىق قازاقتار «اتا جولى» كارتاسىن الىپ، قازاقستانعا وڭايلاتىلعان كىرۋ مۇمكىندىگىن پايدالانا الادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.

«اتا جولى» كارتاسىن ەنگىزۋدىڭ ماقساتى تاريحي وتانمەن بايلانىستى نىعايتۋ، ۇلتتىق داستۇرلەردى ساقتاۋ، قازاقستاندا ولاردىڭ الەۋەتىن ىسكە اسىرۋ ءۇشىن ءبىزدىڭ ەلىمىزگە كاسىپقويلار مەن تابىستى بيزنەسمەندەردى تارتۋ بولىپ تابىلادى. كارتا شەتەلدە تۇراتىن ەتنيكالىق قازاقتارعا ازاماتتىعىن ساقتاي وتىرىپ بەرىلەتىن بولادى. «اتا جولى» كارتاسىنىڭ يەگەرلەرى ەلگە كىرگەن كەزدە 10 جىل مەرزىمگە تۇرۋعا رۇقسات الادى»،-دەپ ءتۇسىندىردى مينيسترلىك.

«اتا جولى» كارتاسى بار ەتنيكالىق قازاقتار باسقا ەلدىڭ ازاماتى بولا تۇرا، قازاقستان ازاماتتارىمەن جانە قانداستارمەن تەڭ قۇقىقتارعا يە بولۋىمەن ەرەكشەلەنەدى.

اتاپ ايتقاندا، مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق مەكەمەلەردە الەۋمەتتىك تولەمدەر مەن قىزمەت كورسەتۋدى الۋعا; قر ەڭبەك كودەكسىنە جانە «حالىقتىڭ كوشى-قونى تۋرالى» قر زاڭىنا سايكەس قر اۋماعىندا جۇمىسقا ورنالاسۋعا; قازاقستان اۋماعىندا كاسىپكەرلىك كودەكسكە جانە قر وزگە دە قۇقىقتىق اكتىلەرىنە سايكەس كاسىپكەرلىك قىزمەتتى جۇزەگە اسىرۋعا; قر «ءبىلىم تۋرالى» زاڭىنا سايكەس مەملەكەتتىك ءبىلىم بەرۋ ۇيىمدارىندا تەگىن ورتا ءبىلىم، مەملەكەتتىك ورتا ارناۋلى جانە/نەمەسە جوعارى وقۋ ورىندارىندا كونكۋرستىق نەگىزدە تەگىن ورتا ارناۋلى جانە/نەمەسە جوعارى ءبىلىم الۋ، جەكە وقۋ ورىندارىندا اقىلى ءبىلىم الۋعا; «ادۆوكاتتىق قىزمەت جانە زاڭ كومەگى تۋرالى» قر زاڭىنا سايكەس مەملەكەت كەپىلدىك بەرگەن زاڭ كومەگىن الۋعا; قازاقستان رەسپۋبليكاسىنىڭ ازاماتتىعى سالاسىنداعى حالىقارالىق شارتتارعا جانە قر زاڭنامالىق قۇقىقتىق اكتىلەرىنە سايكەس جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋعا قۇقىعى بار.

سونداي-اق كارتاعا يە بولعان ەتنيكالىق قازاقتار ەڭبەك ەتۋ نەمەسە بيزنەس جۇرگىزۋ ءۇشىن قايدا قونىستاناتىنىن ءوزى تاڭدايدى.

«اتا جولى» كارتاسى بار ادامداردىڭ قر مەملەكەتتىك ورگاندارى مەن جەرگىلىكتى ءوزىن-ءوزى باسقارۋ ورگاندارىنا سايلاۋعا جانە سايلانۋعا، رەسپۋبليكالىق رەفەرەندۋمعا قاتىسۋعا قۇقىعى جوق جانە مەملەكەتتىك قىزمەتكە كىرە المايدى.

ەگەر «اتا جولى» كارتاسىنىڭ يەسى قازاقستان ازاماتتىعىن السا، وندا كارتا جارامسىز بولادى.

Abai.kz