قر ۇلتتىق ەكونوميكا ءمينيسترى الىبەك قۋانتىروۆ 8-9 ماۋسىم كۇندەرى ەلوردادا وتەتىن استانا حالىقارالىق فورۋمىندا قانداي ماسەلەلەر تالقىلاتىنى تۋرالى ايتىپ بەردى.

«جاڭا فورماتتاعى استانا حالىقارالىق فورۋمى جاھاندىق سىن-قاتەرلەردىڭ ورتاق شەشىمدەرىن تابۋعا باعىتتالعان. بۇل شارا ءتيىمدى ءارى بەدەلدى جانە ەۋرازياداعى باستى ديالوگ الاڭدارىنىڭ ءبىرى. ونىڭ مارتەبەسى شاقىرىلعان سپيكەرلەر مەن دەلەگاتتارىنىڭ دەڭگەيىنەن كورىنەدى. مەملەكەت جانە ۇكىمەت باسشىلارى، جەتەكشى الەمدىك ساراپشىلار مەن ءىرى حالىقارالىق ۇيىمداردىڭ باسشىلارى، سىرتقى ساياسات پەن حالىقارالىق قاۋىپسىزدىك، دامۋ مەن تۇراقتىلىق، ەنەرگەتيكا جانە كليماتتىڭ وزگەرۋى، ەكونوميكا جانە قارجى ماسەلەلەرىن تالقىلايدى. فورۋمنىڭ تاقىرىبى ديالوگ ارقىلى سىن-قاتەرلەردى شەشۋ، ىنتىماقتاستىق، وركەندەۋ جانە پروگرەسس جولىندا. ءبىز ءتۇرلى ەلدەردەن مىڭعا جۋىق دەلەگات قاتىسادى دەپ كۇتۋدەمىز. مارتەبەلى قوناقتار بولادى. قاتىسۋشىلار ەكى كۇن بويى گەوساياسي جاعدايدىڭ شيەلەنىسۋىنە جانە مەملەكەتارالىق ىنتىماقتاستىقتىڭ ءداستۇرلى ۇلگىلەرىن تۇبەگەيلى وزگەرۋىنە بايلانىستى سىن-قاتەرلەرگە جاۋاپ ىزدەيدى»،-دەدى مينيستر.

فورۋم الاڭىندا الەم سپيكەرلەرىنىڭ قاتىسۋىمەن 40-قا جۋىق ءىس-شارا وتپەك. ولار: پانەلدىك سەسسيالار، بەيرەسمي پىكىرتالاستار، كونفەرەنتسيالار.

الىبەك قۋانتىروۆ «حالىقارالىق فورۋم قازاقستانعا نە بەرەدى؟» دەگەن سۇراققا جاۋاپ بەردى.

«بۇل ەڭ الدىمەن ينۆەستيتسيالىق احۋالدىڭ جاقسارۋىنا ىقپال ەتەدى. ەلگە تارتىلاتىن شەتەلدىك ينۆەستيتسيانىڭ ەكونوميكانىڭ دامۋىنا تيگىزەر سەپتىگى مول بولماق. سونداي-اق تۋريستىك الەۋەتتى ارتتىرىپ، قازاقستان ءۇشىن ءتيىمدى ەكونوميكالىق ساياساتتى قالىپتاستىرادى»،-دەدى مينيستر.

قازاقستان ۇكىمەتى ۇيىمداستىرعان ءىس-شارا  EXPO كونگرەسس ورتالىعىندا وتەدى.

Abai.kz