ءماجىلىستىڭ بۇرىنعى دەپۋتاتى نۇرجان التاەۆتىڭ ۇستىنەن قوزعالعان قىلمىستىڭ ءىستىڭ  «اتامەكەن» ۇلتتىق كاسىپكەرلەر پالاتاسىنىڭ (ۇكپ) بۇرىنعى باسقارما توراعاسى ابىلاي مىرزاحمەتوۆتىڭ ىسىنە قاتىسى بار. انتيكور وسىلاي دەپ مالىمدەدى.

«7 ماۋسىمدا سىبايلاس جەمقورلىققا قارسى قىزمەت ەكس-ۆيتسە-مينيستر ن.ب. التاەۆتى اسا اۋىر سىبايلاس جەمقورلىق قىلمىسىن جاسادى دەگەن كۇدىكپەن ۇستادى. ن.ب. التاەۆ ەڭبەك جانە الەۋمەتتىك قورعاۋ ۆيتسە-ءمينيسترى، كەيىننەن قر پارلامەنتى ءماجىلىسىنىڭ دەپۋتاتى بولعان كەزىندە جۇيەلى نەگىزدە «اتامەكەن» ۇكپ باسقارما توراعاسى ا.ي. مىرزاحمەتوۆتەن اسا ءىرى مولشەردە پارا الدى دەپ كۇدىكتەلەدى. 2018-2020 جىلدار كەزەڭىندە جاۋاپتى مەملەكەتتىك لاۋازىمداردى اتقارا وتىرىپ، ول ا.ي. مىرزاحمەتوۆتىڭ مۇددەسىنە قىزمەت ەتىپ، مەملەكەتتىك تاپسىرىستاردى الۋىنا ىقپال ەتتى جانە جالپى قامقورشىلىق كورسەتتى»، - دەپ حابارلادى انتيكور.

التاەۆ استانا پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. تەرگەۋ جالعاسۋدا.

كەشە «پارا الدى» دەگەن كۇدىكپەن ۇستالعان نۇرجان التاەۆ 2017-2018 جىلدار ارالىعىندا اۋىل شارۋاشىلىعى ۆيتسە-ءمينيسترى قىزمەتىن، 2018-2019 جىلدارى  ەڭبەك جانە حالىقتى الەۋمەتتىك قورعاۋ ۆيتسە-ءمينيسترى قىزمەتىن اتقارعان. 2019-2020 جىلدارى پارلامەنت ءماجىلىسىنىڭ دەپۋتاتى بولدى، 2020 جىلى «El Tiregi» اتتى جاڭا پارتيانى قۇراتىنىن ايتقان سوڭ، «نۇر وتان» پارتياسىنىڭ قۇرامىنان شىعارىلعان. الايدا ونىڭ پارتياسى تىركەۋدەن وتپەدى. 2022 جىلعى پرەزيدەنت سايلاۋىنا دا بيىلعى پارلامەنت سايلاۋىنا دا كانديدات رەتىندە قاتىسۋعا ءوتىنىش بەرگەن. بىراق ەكەۋىندە دە وتپەي قالدى.

بيىل ءساۋىر ايىندا التاەۆ بەيبىت ميتينگىلەردى ۇيىمداستىرۋ ەرەجەلەرىن بۇزعانى 15 تاۋلىككە قامالىپ شىقتى.

ال ونىڭ قاتىسى بار دەلىنىپ وتىرعان «اتامەكەن» ۇلتتىق كاسىپكەرلەر پالاتاسىنىڭ (ۇكپ) بۇرىنعى باسقارما توراعاسى ابىلاي مىرزاحمەتوۆ 10 مامىر كۇنى $30 ملن (13,3 ملرد تەڭگە) «پارا الدى» دەگەن كۇدىككە ءىلىنىپ، قامالعان بولاتىن. كەيىننەن قر سىبايلاس جەمقورلىققا قارسى قىزمەت «ول تۋىسىن قىلمىستىق جاۋاپكەرشىلىكتەن بوساتۋعا كومەكتەسكەن جانە كاسىپكەردى اسا ءىرى كولەمدە پارا بەرۋگە يتەرمەلەدى» دەگەن كۇدىككە ىلىنگەنىن رەسمي مالىمدەدى. 13 مامىردا ۇكپ  بۇرىنعى باسشىسىنىڭ ەكى ايعا قاماۋعا الىنعانى بەلگىلى بولدى.

ابىلاي مىرزاحمەتوۆ 2013 جىلدىڭ قىركۇيەگىنەن بەرى باسقارىپ كەلە جاتقان  «اتامەكەن» ۇكپ  باسقارما توراعاسى قىزمەتىنەن 2022 جىلى 18 اقپاندا كەتكەن . سونىمەن قاتار، ءار جىلدارى جەكە سەكتوردا جۇمىس ىستەگەن.  «قازاقستان تەمىر جولىن» باسقارعان جىلدارى اتىشۋلى سوت ءىسىنىڭ قاتىسۋشىسى بولىپ، 2002 جىلى تۇتقىندالعان. ونىڭ 2003 جىلدىڭ مامىرىندا مەملەكەتتىك مۇلىكتى ۇرلاۋدى ۇيىمداستىردى دەگەن ايىپپەن مۇلكى تاركىلەندى، وسىلايشا بەس جىلعا شارتتى تۇردە باس بوستاندىعىنان ايىرۋ جازاسىنا كەسىلگەن بولاتىن.

Abai.kz