«توقاەۆتىڭ ۇستەلدى توقپاقتاۋى تەگىن ەمەس… ەكس-توتەنمين يۋري يلينگە تىقىر تاياعان ءتارىزدى»، - دەپ جازادى DALA INSIDE. وتستاۆكا ول ءۇشىن تىم جەڭىل جازا. اباي وبلىسىنداعى الاپات ءورت ءيليننىڭ سالدىر-سالاقتىعى سالدارىنان باقىلاۋدان شىعىپ كەتتى. 14 ادام وپات بولدى. ولاردىڭ وبالى كىمگە؟...

اباي وبلىسىنا ارنايى بارعان توقاەۆتىڭ اۋزىنان «جازا» دەگەن ءسوز ءجيى-ءجيى شىقتى. سوعان قاراعاندا سمايىلوۆ ۇكىمەتىنە بەرىلگەن سەنىم كرەديتى سارقىلعان سىندى.

يلين؟ ەكس-مينيستر اباي وبلىسىنداعى اپاتقا جول بەرگەنى ءۇشىن جاۋاپقا تارتىلادى. وتستاۆكا ونىڭ ارەكەتسىزدىگىن اقتاي المايدى. پرەزيدەنتتىڭ سوزىنەن سونى اڭعاردىق…

اباي وبلىسىندا ارنايى شتابتىڭ ءماجىلىسىن وتكىزگەن مەملەكەت باسشىسى ورتكە قاتىستى ۇزىنسونار بايانداما جاساۋعا كىرىسكەن توتەنشە جاعداي ۆيتسە-ءمينيسترى مارات كۇلدىكوۆتىڭ ءسوزىن ورتا جولدان ءبولدى:

«يلين؟ مەن قىزمەتىنەن بوساتقان مينيستر ءوزىنىڭ تىكەلەي قىزمەتتىك مىندەتىن ورىنداۋعا نەگە مۇلدەم نەمقۇرايلى قارايدى؟!

14 ادام قازا تاپتى. ءسىز وسىنى تۇسىنەسىز بە؟ مەن ولاردىڭ وتباسىلارىمەن كەزدەستىم. بۇل ازاماتتار ءوز وتباسىنىڭ پەرزەنتتەرى، وتاعاسى بولاتىن. ءبىر وتباسىندا ەكى جاسار بالا جەتىم قالدى. ادامداردىڭ ارتىندا نەسيەلەرى قالدى. ولار وتباسىنىڭ جالعىز اسىراۋشىسى ەدى»، - دەدى توقاەۆ.

توقاەۆ توڭىرەگىندەگى ادامداردىڭ جۇمىسقا دەگەن قارىم-قاتىناسىنان ءتۇڭىلىپ ءجۇر. توتەنمينگە ءوز قولىمەن جەتەكتەپ اكەلگەن ءيليننىڭ حالىقتىڭ قارعىسىنا ۇشىراپ، سەنىمدى اقتاي الماعانى جانىنا باتقان. الداعى كۇندەرى ەكس-مينيسترگە قاتىستى «قاتاڭ شارا» قابىلدانباق. ايتا كەتەلىك، توتەنشە جاعداي مينيسترلىگى توقاەۆقا تىكەلەي باعىناتىن قۇرىلىم.

اباي وبلىسىنىڭ جۇرتشىلىعىمەن جۇزدەسكەن توقاەۆ جۇيەنىڭ ەسكى قازاقستاننىڭ ادەتىنەن ءالى كۇنگە ارىلماعانىن سىنعا الدى.

«ادامداردىڭ تاعدىرىنا مۇلدە نەمقۇرايلى قاراۋ…». پرەزيدەنتتىڭ سمايىلوۆ ۇكىمەتىنە بەرگەن باعاسى وسىنداي. نازارباەۆتىڭ قامىرىنان يلەنگەن شەندى-شەكپەندىلەر توقاەۆتىڭ اياعىنان شالۋدى دوعارار ەمەس.

Abai.kz