قازاقستاندىق سپورتشى 35 جاستاعى ۆلاديمير سەدوۆ قايتىس بولدى. قارالى حاباردى قازاقستان اۋىر اتلەتيكا فەدەراتسياسى جەتكىزگەن.

«كەشە كەشكىسىن تاجىريبەلى اۋىر اتلەت ۆلاديمير سەدوۆ دۇنيەدەن ءوتتى. 2008 جىلعى وليمپيادا قاتىسۋشىسى، قازاقستاننىڭ بىرنەشە دۇركىن چەمپيونى جانە رەكوردسمەنى ۆلاديمير سەدوۆ بالا كەزىنەن سپورتقا شىن بەرىلگەن جان ەدى. ەرەكشە جەتىستىكتەرى ءۇشىن «قۇرمەت» وردەنىمەن ماراپاتتالعان. اۋىر اتلەتيكا فەدەراتسياسىنىڭ ۇجىمى ءۆلاديميردىڭ وتباسىنا، تۋعان-تۋىستارى مەن جاقىندارىنا قايعىسىنا ورتاقتاسىپ كوڭىل ايتادى»،-دەپ جازادى فەدەراتسيا Facebook پاراقشاسىندا.

قازىر ۆلاديمير سەدوۆتىڭ ولىمىنە قاتىستى قىلمىستىق ءىس قوزعالدى.

«35 جاستاعى اۋىر اتلەتتىڭ دەنەسى ءوزى تۇراتىن مەكەنجايى قاراتال اۋدانىنداعى دوستىق اۋىلىنان تابىلدى. دەنەسىنەن زورلىق-زومبىلىق بەلگىلەرى انىقتالعان جوق. مارقۇمنىڭ تۋىستارىنىڭ بەرگەن تۇسىنىكتەمەسىنە سايكەس، ەر ازامات ءوز-وزىنە قول جۇمساعان. قازىر وسى سۋيتسيد فاكتىسىنە وراي قىلمىستىق ءىس قوزعالدى»، - دەلىنگەن جەتىسۋ وبلىستىق پوليتسيا دەپارتامەنتى ءباسپاسوز قىزمەتىنىڭ حابارلاماسىندا.

قازىر تەرگەۋ قر قىلمىستىق كودەكسىنىڭ 105-بابى، ياعني ءوز-وزىنە قول جۇمساۋعا جەتكىزۋ فاكتىسى بويىنشا ءجۇرىپ جاتىر.

ۆلاديمير سەدوۆ 1988 جىلى 2 ناۋرىزدا ۇشتوبەدە دۇنيەگە كەلگەن.

سەدوۆتار اۋلەتىندە ءتورت بالا بار. ۆلاديمير جاستايىنان سپورتپەن اينالىسقان.

اعاسى سەرگەي سەدوۆ جاتتىقتىرۋشىلىقپەن اينالىسادى، الماتى وبلىسى اۋىر اتلەتيكا فەدەراتسياسىنىڭ جاتتىقتىرۋشىسى بولعان. قازىر اۋىر اتلەتيكادان قازاقستان ەرلەر قۇراماسىنىڭ باپكەرى.

ۆلاديمير سەدوۆ قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، حالىقارالىق دارەجەدەگى سپورت شەبەرى ەدى.

فوتو: عالامتوردان

Abai.kz