رەسەي قورعانىس ءمينيسترى سەرگەي شويگۋ "ۆاگنەر" جەكە اسكەرىنىڭ يەسى ەۆگەني پريگوجيننىڭ بۇلىگىنە قاتىستى العاش رەت پىكىر ءبىلدىرىپ، "اسكەري بۇلىك جۇزەگە اسپاي قالدى", "پروۆوكاتسيا ۋكرايناداعى رەسەي اسكەرىنىڭ ارەكەتىنە اسەر ەتپەدى" دەدى.

"قارۋلى كۇشتەردىڭ جەكە قۇرامى انتقا جانە اسكەري مىندەتىنە ادال بولعاندىقتان بۇلىكتىڭ جوسپارى ساتسىزدىككە ۇشىرادى. اسكەري قىزمەتكەرلەر ەرلىكپەن وزدەرىنە قويىلعان مىندەتتى ورىندادى" دەدى شويگۋ سەلەكتورلىق وتىرىستا.

رەسەي قورعانىس ءمينيسترىنىڭ سوزىنە ريا نوۆوستي اگەنتتىگى تاراتتى.

23-25 ماۋسىمداعى پريگوجيننىڭ بۇلىگى كەزىندە شويگۋ ءۇنسىز قالعان ەدى. ال 26 ماۋسىمدا شويگۋ پۋتين قاتىسقان جيىندا وتىرعان، بىراق اسكەري بۇلىك جايلى ەشتەڭە ايتپاعان.

The Wall Street Journal دەرەككوزىنە سىلتەمە جاساپ، پريگوجين اسكەري بۇلىك كەزىندە شويگۋ مەن رەسەي اسكەرىنىڭ باس شتابىنىڭ جەتەكشىسى ۆالەري گەراسيموۆتى ۇستاماق بولدى دەپ جازادى.

23 ماۋسىمدا پريگوجين رەسەي اسكەري "ۆاگنەردىڭ" بازاسىنا راكەتامەن شابۋىلدادى دەپ حابارلادى. كەيىن "ۆاگنەردىڭ" 25 مىڭ جاۋىنگەرى شويگۋ مەن گەراسيموۆتى جازالاۋ ءۇشىن ماسكەۋگە قاراي شىققان.

"ۆاگنەر" ءبىر كۇننىڭ ىشىندە دونداعى روستوۆ قالاسىن باقىلاۋعا العان. بۇلىك كەزىندە "ۆاگنەر" بىرنەشە تىكۇشاق پەن رەسەي اسكەرىنىڭ ۇشاعىن قۇلاتقان. بىرنەشە ۇشقىش قازا تاپقان.

پريگوجين بەلارۋس بيلىگىن قولىنا ۇستاپ وتىرعان اۆتوريتار الەكساندر لۋكاشەنكومەن كەلىسسوزدەن كەيىن بۇلىكتى توقتاتقان.

Abai.kz