«وپەراتور روپ بويىنشا ىزدەۋدە جۇرگەن كۇدىكتى بىرىككەن اراب امىرلىگىندە ۇستالدى»، دەپ حابارلادى انتيكور.

سىبايلاس جەمقورلىققا قارسى قىزمەت بۇعان دەيىن «وپەراتور روپ» جشس-ءنىڭ بۇرىنعى قۇرىلتايشىسى ش. مۇقتاروۆاعا اسا ءىرى مولشەردە جىمقىرۋ كۇدىگىمەن حالىقارالىق ىزدەستىرۋ جاريالاعان بولاتىن.

ول دۋباي قالاسىندا ۇستالىپ، ينتەرپولدىڭ كومەگىمەن بىرىككەن اراب امىرلىكتەرىنىڭ ۋاكىلەتتى ورگاندارى قاماۋعا الدى.

قازىرگى ۋاقىتتا قازاقستان رەسپۋبليكاسىنىڭ باس پروكۋراتۋراسى ونى ەكستراديتسيالاۋ ءراسىمىن جۇزەگە اسىرۋدا.

بۇعان دەيىن «وپەراتور روپ» ءىسى بويىنشا سوتتالعاندار كۇدىكتى شىنار مۇقتاروۆانىڭ قاعاز جۇزىندە كومپانيا قۇرىلتايشىسى ەكەنىن، ال ءىس جۇزىندە ءاليا نازارباەۆانىڭ ءۇي قىزمەتشىسى ەكەنىن مالىمدەگەن.

Abai.kz