«جانۋارلارعا جاۋاپكەرشىلىكپەن قاراۋ تۋرالى» قر زاڭىنا سايكەس، بيىل 1 قىركۇيەكتەن باستاپ مىسىق پەن يتكە چيپ تاعۋ جانە ولاردى ارنايى ەسەپكە قويۋ مىندەتتى بولادى.

ال ءۇي جانۋارلارىنىڭ باسقا تۇرلەرىن، ياعني ەگەۋقۇيرىق، حومياك نەمەسە ميني-پيگتەردى (ەرگەجەيلى ءۇي شوشقاسى – اۆتور تۇسىندىرمەسى) ەسەپكە الۋ ەرىكتى نەگىزدە جۇرگىزىلەدى.

قازاقستاندىقتار ءۇشىن ەلەكتروندىق جۇيەگە جانۋارلارى تۋرالى اقپاراتتى ەنگىزۋ – تەگىن. دەگەنمەن چيپ تاعۋ ءۇشىن مىسىق پەن يت يەلەرى ءوز قالتاسىنان اقشا تولەۋى ءتيىس. ونى وتەۋگە مۇمكىندىگى جوق الەۋمەتتىك وسال توپتاعى ازاماتتارعا قىزمەت ءتۇرى تەگىن بولماق.

ەnergyprom.kz پورتالىنىڭ اقپاراتىنا ساي، ەلىمىزدىڭ ءىرى قالالارىندا مىسىقتار مەن يتتەرگە چيپ تاعۋ قىزمەتىنىڭ باعاسى 3,5-8 مىڭ تەڭگە ارالىعىندا.

Abai.kz