الماتىدا قوعامدىق كولىك جولاقىسى قىمباتتايدى
الماتى قالاسىندا جول ءجۇرۋ اقىسى قىمباتتاۋى مۇمكىن. اشىق نقا پورتالىندا وسىنداي ۇسىنىس جازىلعان اكىمدىك قاۋلىسى جاريالاندى، دەپ حابارلايدى Ulysmedia.kz.
21 شىلدەگە دەيىن تالقىلاۋعا ۇسىنىلعان قاۋلى جوباسىنا سايكەس الماتىدا جولاۋشىلار كولىگىندەگى تاريفتەردى قايتا قاراۋ جانە ولاردى قولما-قول اقشاسىز تولەۋ كەزىندە 100 تەڭگە جانە قولما-قول اقشامەن 200 تەڭگە مولشەرىندە بەلگىلەۋ ۇسىنىلدى. قازىر جولاقىسى تيىسىنشە 80 تەڭگە جانە 150 تەڭگەگە تەڭ. وسىلايشا، تولەم ادىسىنە بايلانىستى جول ءجۇرۋ قۇنى 25-33%-عا وسەدى.
بۇگىندە قالاداعى قوعامدىق كولىكتەردە جول ءجۇرۋ اقىسى قولما-قول اقشاسىز تولەم ادىسىمەن تولەنگەن كەزدە 80 تەڭگە ەكەنىن ءتۇسىندىردى. تاريف 2012 جىلدان بەرى وزگەرمەگەن.
قۇجاتتا كورسەتىلگەندەي، استانادا ءتاريفتىڭ قۇنى – 90 تەڭگە جانە 180 تەڭگە، شقو-دا – 90 تەڭگە جانە 130 تەڭگە، جامبىل وبلىسىندا – 85 تەڭگە جانە 130 تەڭگە، قوستاناي وبلىسىندا – 100 تەڭگە جانە 170 تەڭگە مولشەرىندە بەلگىلەنگەن.
قالالىق موبيلدىلىك باسقارماسى تاريفتەردىڭ كوتەرىلۋىن سوڭعى ون جىلدا كولىك باعاسىنا قاراعاندا تاسىمالداۋشىلاردىڭ شىعىنى ايتارلىقتاي وسكەنىمەن بايلانىستىردى.
ماسەلەن، ديزەلدىك وتىننىڭ قۇنى بۇرىن ليترىنە 90 تەڭگە بولسا، قازىر 300 تەڭگەگە جۋىقتادى. ال گازدىڭ قۇنى 33 تەڭگەدەن 108-گە قىمباتتادى.
«بۇل شىعىندار تاسىمالداۋشىلار شىعىنىن سۋبسيديالاۋ كولەمىندە تىكەلەي كورسەتىلەدى. ماسەلەن، 2017-2022 جىلدار ارالىعىندا سۋبسيديالاۋ كولەمى 13,8 ەسەگە، ياعني 6,9 ملرد تەڭگەدەن 50 ملرد تەڭگەگە دەيىن ءوستى. بيىل سۋبسيديالاۋدىڭ بولجامدى كولەمى بەكىتىلگەن تاريف بويىنشا شامامەن 85,5 ملرد تەڭگەنى قۇرادى. وسىلايشا، قوعامدىق كولىك ءتاريفىنىڭ قازىرگى قۇنى ساقتالىپ تۇرسا، سۋبسيديا كولەمى جىلدان جىلعا ارتىپ، جەرگىلىكتى بيۋدجەتكە اۋىر سالماق تۇسىرەدى.
ايتا كەتەرلىگى، بيىلعى تاريفتەردى ەسەپتەۋ ادىستەمەسى بويىنشا ءتاريفتىڭ ورتاشا قۇنى 425 تەڭگەنى قۇرايدى. وسىعان وراي، 2023 جىلى ءتاريفتىڭ قۇنىن قايتا قاراپ، ونى قولما-قول اقشاسىز تولەم ءۇشىن 100 تەڭگە، قولما-قول تولەم ءۇشىن 200 تەڭگە ەتىپ بەلگىلەۋ قاجەتتىلىگى تۋىنداپ وتىر. بۇل رەتتە 2023 جىلى سۋبسيديالاۋدىڭ بولجامدى كولەمى 10 ملرد تەڭگەدەن استامعا قىسقارادى»، - دەلىنگەن تۇسىندىرمە جازبادا.
فوتو: الماتى اكىمدىگى
Abai.kz
