قىرعىزستان پرەزيدەنتى سادىر جاپاروۆتىڭ جيەنى ۇلان جاپاروۆ ۇستالدى. 

بىشكەكتىڭ ءبىرىنشى ماي اۋداندىق سوتى ونىڭ 26 شىلدەگە دەيىن 1 تەرگەۋ يزولياتورىنا قامالعانىن جازدى. 

ىشكى ىستەر مينيسترلىگىنىڭ مالىمەتىنشە، ۇلان جاپاروۆ سىبايلاس جەمقورلىققا قاتىسى بار دەگەن كۇدىكپەن ۇستالعان. پرەزيدەنتتىڭ ءباسپاسوز حاتشىسى ەربول سۇلتانباەۆ كۇدىكتىنىڭ مەملەكەت باسشىسىنىڭ تۋىسى ەكەنىن راستادى.

پرەزيدەنت اكىمشىلىگىندەگىلەر ۇستالعان ازامات پرەزيدەنتتىڭ تۋىسقان اعاسى راقىمجان جاپاروۆتىڭ ۇلى ەكەنىن ناقتىلادى. ىشكى ىستەر مينيسترلىگى ونى كەدەندەگى سىبايلاس جەمقورلىق سحەمالارىنا قاتىستى دەگەن كۇدىكپەن ۇستادى.

«بۇل تۋرالى حاباردار بولعاننان كەيىن پرەزيدەنت كۇدىكتىلەرگە زاڭدى شارا قولدانۋدى تالاپ ەتتى. بۇل جاعداي سىبايلاس جەمقورلىقپەن كۇرەستە ىرىكتەۋ جوقتىعىن تاعى ءبىر مارتە كورسەتتى. تۋىستىق جانە باسقا دا بايلانىستارىنا قاراماستان كەز-كەلگەن ازامات قىلمىس نەمەسە قۇقىقبۇزۋشىلىق جاساعان جاعدايدا زاڭ شەڭبەرىندە جاۋاپكەرشىلىككە تارتىلادى. ەگەر ءىس سىبايلاس جەمقورلىققا قاتىستى بولسا، وندا كەلتىرىلگەن زياندى وتەۋ مىندەتتى»، - دەدى سۇلتانباەۆ.

Abai.kz