6 شىلدەدە قوستاناي ءوڭىرىنىڭ "زارەچنوە" تاجىريبەلىك-وندىرىستىك شارۋاشىلىعىنىڭ اۋماعىندا يتاليالىق پرۋس پەن تابىندىق ەمەس شەگىرتكەلەردىڭ ءۇيىرى انىقتالدى.

ول جەرگە قوستاناي وبلىستىق اۋماقتىق ينسپەكتسياسىنىڭ جەتەكشىسى دارحان ابدىكارىموۆ باستاعان ماماندار توبى باردى. ەگىستىكتەردى زەرتتەۋ ناتيجەسى قوستاناي اۋدانىنىڭ ازعانتاي اۋماقتارىندا زيانكەستەردىڭ تارالعانىن كورسەتتى.  سونداي-اق جاندىكتەردىڭ تارالۋ قاۋپىنىڭ تومەندىگىنە قاراماستان، بۇل اۋداندا جانە قوستاناي قالاسىندا اۋماقتارعا حيميالىق وڭدەۋ جۇرگىزۋ تۋرالى شەشىم قابىلداندى.

ايتا كەتەيىك، بۇگىنگى تاڭدا قوستاناي وبلىسىندا تابىن شەگىرتكە زيانكەستەرىنىڭ بولۋىنا بايلانىستى 1,7 ملن گا جەر زەرتتەلدى. يتاليالىق پرۋسقا قارسى قورعانىس شارالارى 290,9 مىڭ گا جەردە، ازيالىق شەگىرتكەگە قارسى 6,5 مىڭ گا جەردە جۇرگىزىلدى. وبلىسقا بارلىق قاجەتتى پرەپاراتتاردىڭ كولەمى الدىن الا جەتكىزىلدى.

جالپى، تابىن شەگىرتكەلەرىنىڭ دامۋى مەن تارالۋى تسيكلدىك سيپاتقا يە. اۋا-رايى مەن كليماتتىق جاعدايلارعا بايلانىستى ءار جىلدارى زيانكەستەر سانىنىڭ كوبەيۋى مەن  ازايۋى بولدى.

ماسەلەن، شەگىرتكەلەردىڭ ەڭ اۋقىمدى تارالۋى 2000 جىلى تىركەلگەن بولاتىن، 7,1 ملن گا اۋماققا تارادى.2015 جىلدان 2019 جىلعا دەيىن حيميالىق وڭدەۋ الاڭىنىڭ 3,2 ملن گەكتاردان 567,6 مىڭ گەكتارعا دەيىن تومەندەۋى بايقالدى. 2020 جىلدان باستاپ قازىرگى ۋاقىتقا دەيىن تابىن زيانكەستەرىنىڭ تارالۋىنىڭ كوبەيگەنى بايقالادى.

Abai.kz