ءماجىلىس دەپۋتاتتارى، «AMANAT» فراكتسياسىنىڭ مۇشەلەرى – اينا ءمىسىرالىموۆا مەن ناتاليا دەمەنتەۆا  اقمولا وڭىرىنە جۇمىس ساپارىمەن بارىپ، «AMANAT» پارتياسىنىڭ سايلاۋالدى باعدارلاماسى اياسىندا ىسكە اسىپ جاتقان بىرقاتار نىساندا بولدى.

ءبىرىنشى كەزەكتە دەپۋتاتتار اقكول قالاسىندا مەديتسينا قىزمەتكەرلەرىنە ارنالعان ەمدەۋ-ساۋىقتىرۋ ورتالىعىنىڭ قۇرىلىسى بارىسىمەن تانىستى. ونىڭ قۇرىلىسىنا بيۋدجەتتەن 4,5 ملرد تەڭگە ءبولىنىپ وتىر. مەردىگەر كومپانيانىڭ وكىلى قۇرىلىستىڭ كەستەگە ساي جۇرگىزىلىپ جاتقانىن جانە بەلگىلەنگەن مەرزىمدە اياقتالاتىنىن اتاپ ءوتتى.

– ءدال قازىرگى ۋاقىتتا ەلەكتر، تەلەكوممۋنيكاتسيا مەن سۋ جەلىلەرى تارتىلىپ جاتىر. سونىمەن قاتار ەمدەۋ كورپۋسىنىڭ، قوناق ءۇي مەن باسسەيننىڭ قۇرىلىسى قارقىندى جۇرگىزىلۋدە.  قۇرىلىس اياقتالعان سوڭ ورتالىقتا 50 ادامدى جۇمىسپەن قامتۋ كوزدەلۋدە، – دەدى قۇرىلىس بارىسىن تانىستىرعان «SENIM»  دەنساۋلىق ساقتاۋ قىزمەتكەرلەرىنىڭ سالالىق كاسىپوداعى»  توراعاسىنىڭ كەڭەسشىسى دينا نۇرپەيىسوۆا.

ءماجىلىس دەپۋتاتتارى اقكول قالاسىنداعى №4 ورتا مەكتەپتە دە بولدى. قازىر وندا سپورت زال مەن اسحانا سالىنىپ جاتىر. بۇدان بولەك، حالىق قالاۋلىلارى ەمدەۋ-ساۋىقتىرۋ قوناق ءۇي كەشەنىنە باردى. ونىڭ قۇرىلىسى بيىل اياقتالادى دەپ جوسپارلانىپ وتىر. ماماندار دەمالىس ورتالىعى استانالىقتار مەن ىرگەلەس جاتقان اۋدان تۇرعىندارى ءۇشىن جايلى دەمالىس ورنىنا اينالادى دەگەن سەنىمدە.

سونداي اق ا.ءمىسىرالىموۆا مەن ن.دەمەنتەۆا 900 تۇرعىنى بار دومبىرالى اۋىلىندا 16 شاقىرىم سۋ قۇبىرىن جوندەۋ جۇمىستارىمەن تانىستى. قازىرگى تاڭدا 2,2 شاقىرىم قۇبىر توسەلىپ، 43 ۇڭعىما ورنالاستىرىلعان.

– پارتيانىڭ قوعامدىق قابىلداۋلارىنا دومبىرالى اۋىلىنداعى سۋ قۇبىرلارىن جوندەۋ بويىنشا تالاي ارىز-شاعىم كەلىپ ءتۇستى. سوندىقتان اۋداندىق ءماسليحات جانىنداعى «AMANAT» فراكتسياسىنىڭ مۇشەلەرى اۋىل تۇرعىندارىن تازا اۋىز سۋمەن قامتاماسىز ەتۋ ماسەلەسىن ەرەكشە باقىلاۋىندا ۇستاۋى كەرەك، – دەدى اينا ءمىسىرالىموۆا.

ءماجىلىس دەپۋتاتتارى اۋداندىق ماسليحاتتاعى دەپۋتاتتىق فراكتسيا مۇشەلەرىمەن «AMANAT» پارتياسى سايلاۋالدى باعدارلاماسىنىڭ جول كارتاسىنىڭ ورىندالۋ بارىسىن تالقىلاپ، ازاماتتاردى قابىلدادى.

Abai.kz