بيلىك بۇل زاڭ ونلاين-پلاتفورمالار مەن ونلاين-جارناما جۇمىسىن رەتتەپ، بلوگەرلەر مەن ينفليۋەنسەردىڭ جارنامادان تاباتىن "كولەڭكەلى پايداسىن" اشىپ، ينتەرنەتتەگى كونتەنتتەردى رەتتەيدى دەپ سانايدى.
زاڭ دەمەۋشىلىك جاسالعان كونتەنتتەردى، پابليكتەر مەن ولاردىڭ مودەراتورلارىن، ينفليۋەنسەرلەردى، ونلاين-جارنامالاردى، تارگەت جارنامالاردى، حابارلاما الماساتىن مەسسەندجەرلەردى، جەلىدەگى اككاۋنتتاردى قاداعالايدى.
زاڭعا ساي، اقپارات جانە قوعامدىق دامۋ مينيسترلىگى ونلاين-پلاتفورمالارعا مونيتورينگ جۇرگىزەدى. مينيسترلىك ينتەرنەتتەگى قانداي دا ءبىر كونتەنت يا جارناما زاڭعا ساي ەمەس دەپ تاپسا، اۆتورىنا بەس كۇننىڭ ىشىندە زاڭ بۇزۋشىلىقتى جويۋدى تالاپ ەتەدى. ەكىنشى تاراپ مينيسترلىكتىڭ تالابىمەن كەلىسپەسە ءۇش كۇننىڭ ىشىندە قارسى شاعىم تۇسىرە الادى.
سونداي-اق قازاقستاندا 100 مىڭنان اسا قولدانۋشىسى بار جەلىلەر (Instagram, Facebook, YouTube, Twitter, Telegram, TikTok, VK) ەلدە رەسمي وكىلىن تاعايىنداۋى مىندەتتى. بۇعان قوسا. ونلاين-پلاتفورمالاردىڭ ينتەرفەيسى مەن مودەراتسياسىنا قازاق ءتىلىن ەنگىزۋ قاراستىرىلعان. بۇل جەلىلەردىڭ الگوريتمىنە كونتەنتتەردى قازاق تىلىندە مودەراتسيا جاساۋعا مۇمكىندىك بەرەدى.
زاڭ بويىنشا، قازاقستان بيلىگى تالاپقا ساي ەمەس دەپ تاپقان كونتەنتتى ونلاين-پلاتفورمالار جويۋى ءتيىس.
"ونلاين-پلاتفورمالار جانە ونلاين-جارناما ماسەلەلەرى زاڭى" قابىلدانعان سوڭ توقاەۆ "اكىمشىلىك كودەكسكە وزگەرتۋلەر ەنگىزۋ تۋرالى" قول قويدى. ەكى زاڭ بىرىگىپ، ينتەرنەتتە جالعان اقپارات تاراتقاندارعا اكىمشىلىك جازا قاراستىرادى. ينتەرنەتتە جالعان اقپارات تاراتقان قاراپايىم قولدانۋشىعا 20 اەك (69 مىڭ تەڭگە), بلوگەر يا ينفليۋەنسەرگە 40 اەك (138 مىڭ تەڭگە) ايىپپۇل سالىنادى.
