اكتسيا وتكىزۋگە 30 جاستاعى ەر ادام ءوتىنىش بىلدىرگەن. ول مانيفەست ستوكگولمدەگى مەشىت جانىندا قۇراننىڭ ورتەلۋىنە جاۋاپ جانە ءسوز بوستاندىعى ءۇشىن جيىن بولاتىنىن باسا ايتقان.

Times of Israel گازەتىنىڭ حابارلاۋىنشا، يزرايل شەنەۋنىكتەرى شۆەتسيا ۇكىمەتىن بۇل ارەكەتتى توقتاتۋعا شاقىرىپ، "مەن شۆەتسيانىڭ قاسيەتتى كىتاپتاردى ورتەۋگە رۇقساتىن ءسوزسىز ايىپتايمىن. ءبىز دۇنيە جۇزىندەگى مۇسىلماندار ءۇشىن قاسيەتتى قۇراننىڭ ورتەلۋىن ايىپتايمىز، ەندى ەۆرەي حالقىنىڭ ماڭگىلىك كىتابى بولعان ەۆرەي بيبلياسىن دا ءدال وسىنداي جاعداي كۇتىپ تۇرعانىنا جۇرەگىمىز اۋىرادى. <…> بۇكىل الەم بىرىگىپ، بۇل جيىركەنىشتى ارەكەتتى قاتاڭ ايىپتاۋى كەرەك»، - دەدى يزرايل پرەزيدەنتى يتسحاك گەرتسوگ مالىمدەمەسىندە.

بۇعان دەيىن تۇركيانىڭ سىرتقى ىستەر ءمينيسترى حاكان فيدان شۆەتسيادا قۇراندى ورتەۋ اكتسياسى تۋرالى ايتقان بولاتىن.

«مەن شۆەتسيادا قۇربان ايتتىڭ ءبىرىنشى كۇنى قاسيەتتى كىتابىمىز قۇران كارىمگە قارسى جاسالعان وسى زۇلىم ارەكەتتى ايىپتايمىن»، - دەلىنگەن حابارلامادا.

ايتا كەتەيىك، شۆەتسيا پوليتسياسى مۇسىلمانداردىڭ قۇربان ايت مەرەكەسىنىڭ ءبىرىنشى كۇنى، ماۋسىمنىڭ 28-ءى كۇنى ستوكگولمدەگى مەشىتتىڭ سىرتىندا قۇراندى ورتەۋگە رۇقسات بەرگەن بولاتىن.

اقپان ايىندا پوليتسيا تۇركيا مەن يراك ەلشىلىكتەرىندە قۇران ورتەيتىن ەكى ءىس-شارا وتكىزۋ تۋرالى وتىنىشتەردى لاڭكەستىك ارەكەتتەر قاۋپىنە بايلانىستى قابىلدامادى. كەيىن شۆەتسيا سوتى بۇل شەشىمدى زاڭسىز دەپ اتادى.

ەسكە سالايىق، قاڭتار ايىنىڭ سوڭىندا دانيانىڭ يسلامعا قارسى «سترام كۋرس» («قاتاڭ كۋرس») پارتياسىنىڭ جەتەكشىسى راسمۋس پالۋدان ستوكگولمدەگى تۇركيا ەلشىلىگىنىڭ الدىندا قۇراندى ورتەپ جىبەرگەن بولاتىن. وسىدان كەيىن تۇركيا پرەزيدەنتى رەجەپ تايىپ ەردوعان بىلتىر مامىردا ناتو-عا مۇشەلىككە ءوتىنىش بەرگەن شۆەتسيادان بۇل ماسەلەدە انكارادان قولداۋ كۇتپەۋدى سۇرادى.