پاۆلودار وبلىسىنىڭ اكىمى اسايىن بايحانوۆ «ەرتىس ورمانى» رەزەرۆاتىندا بولىپ جاتقان ءورتتىڭ قاشان تولىق ءسوندىرىلۋى مۇمكىن ەكەنىن ايتتى.

«قۇرمەتتى جەرلەستەر! بۇگىن ساعات 14:00-دە شارباقتى اۋدانىنداعى «ەرتىس ورمانى» رەزەرۆاتى اۋماعىنداعى تابيعي ءورت وقشاۋلاندى. الداعى بىرنەشە كۇندە ءورتتى تولىق ءسوندىرۋ جوسپارلانىپ وتىر. بۇل رەتتە ءورت وشاقتارىن انىقتاپ، ولاردىڭ قايتا تۇتانباۋىن قاداعالاۋ ماڭىزدى. سونىمەن قاتار ءتىلسىز جاۋمەن كۇرەسكە جۇمىلدىرىلعان ءورت سوندىرۋشىلەر مەن ورمانشىلارعا العىس بىلدىرەمىن»، - دەدى اسايىن بايحانوۆ ءوزىنىڭ Instagram پاراقشاسىندا جاريالاعان حابارلاماسىندا.

بۇعان دەيىن «ەرتىس ورمانى» رەزەرۆاتىندا 850 گەكتار جەر ورتەنىپ جاتقانى تۋرالى حابارلانعان.

وقيعا ورنىنا توتەنشە جاعدايلار ءمينيسترى سىرىم ءشارىپحانوۆ بارىپ، جاعدايدى ءوز باقىلاۋىنا الدى.

ايتا كەتەيىك، كەشە «ەرتىس ورمانى» رەزەرۆاتىندا ءورت شىقتى.

قر توتەنشە جاعدايلار مينيسترلىگى ءباسپاسوز قىزمەتىنىڭ حابارلاۋىنشا، 15 شىلدە كۇنى شارباقتى اۋدانىنىڭ ستەپنوە جانە باۋىرتال ورمانشىلىقتارىندا ورماننان ءورت شىقتى.

Abai.kz