2023 جىلعى 1 شىلدەدەگى جاعداي بويىنشا مەملەكەتتىك الەۋمەتتىك ساقتاندىرۋ قورىنان  جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 110,6 مىڭ ادامدى قۇرادى. بۇل رەتتە بيىل 97,4 مىڭ ادامعا تولەم العاش رەت تاعايىندالدى.

سالىستىرۋ ءۇشىن: 1 ماۋسىمداعى جاعداي بويىنشا 94,4 مىڭ ادام جۇمىسىنان ايىرىلۋىنا بايلانىستى تولەم العان. وسىلايشا، ماۋسىم ايىندا جۇمىسىنان ايىرىلعان قازاقستاندىقتار 16,2 مىڭ ادامعا ارتتى.

مينيسترلىك اتاپ وتكەندەي، قولدانىستاعى زاڭناماعا سايكەس جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم جوعالعان كىرىستىڭ 45%-ىنا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.

تولەم تاعايىنداۋ ءۇشىن جۇمىستان بوساتىلعان جۇمىسكەرگە:

- eGov.kz پورتالىندا اۆتوريزاتسيالانۋ;

- «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ;

- ونلاين-قىزمەتكە تاپسىرىس بەرىپ، بارلىق جولداردى تولتىرۋ جانە وعان ەتسق-مەن قول قويىپ، ءوتىنىمدى جىبەرۋ قاجەت;

- ءبىر كۇن ىشىندە تۇرعىلىقتى جەرىڭىزدەگى مانساپ ورتالىعى (بۇدان ءارى – مو) بوس جۇمىس ورىندارىن ۇسىنادى;

- ەگەر جۇمىس تابىلماسا، 3 جۇمىس كۇنى ىشىندە قاشىقتىقتان جۇمىسسىز مارتەبەسى بەرىلەدى (قاجەت بولعان جاعدايدا سىزگە مو قىزمەتكەرى قوسىمشا اقپارات جيناۋ ءۇشىن حابارلاسادى);

بۇل قىزمەتتى ونلاين رەجيمىندە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.

“2023 جىلعى 1 قاڭتاردان باستاپ جوعالعان تابىستى الماستىرۋ كوەففيتسيەنتى 40% - دان 45% - عا دەيىن ۇلعايتىلدى. بۇل رەتتە تولەم تاعايىنداۋدىڭ اعىمداعى ءتارتىبى ساقتالدى جانە جۇمىسىنان ايىرىلعان جانە جۇمىسسىز مارتەبەسىن العان الەۋمەتتىك ساقتاندىرۋ جۇيەسىنە قاتىسۋشىلارعا عانا قولدانىلادى. جۇمىسىنان ايىرىلۋ بويىنشا الەۋمەتتىك تولەم مولشەرىنىڭ ءوسۋى 2023 جىلعى 1 قاڭتارداعى جاعداي بويىنشا جۇمىس ىستەپ تۇرعان الۋشىلارعا دا اسەر ەتتى، ول اۆتوماتتى تۇردە جۇرگىزىلدى”، – دەلىنگەن حابارلامادا.

Abai.kz