ول قىلمىستىق كودەكستىڭ "ادام ءولتىرۋ" جانە "سەكسۋالدىق سيپاتتاعى زورلىق-زومبىلىق ارەكەتتەرى" بابىمەن كۇدىككە ىلىنگەن. قاۋلى 15 شىلدە كۇنى كەشكە شىققان.

تۇركىستان وبلىستىق سوتى ءباسپاسوز قىزمەتى ءىس قۇجاتتارىنا سۇيەنىپ، وقيعانىڭ قالاي بولعانى جونىندە العاشقى رەسمي دەرەكتەردى حابارلادى. ول دەرەكتەرگە قاراعاندا، كۇدىكتى ماس حالدە بولىپ، ويناپ جۇرگەن 5 جاسار قىزدى ءان قويىپ بەرەمىن دەپ الداپ ءوز ءۇيىنىڭ اۋلاسىنا كىرگىزگەن. جابىرلەنۋشىنىڭ دارمەنسىز كۇيىن پايدالانىپ، كۇش قولدانعان. سەكسۋالدىق سيپاتتاعى زورلىق-زومبىلىق ارەكەتتەرىن قاساقانا جاساعان.

سوتتىڭ مالىمدەمەسى بويىنشا، كۇدىكتى قىلمىسىن جاسىرۋ ءۇشىن قىزدى ولتىرۋگە بەل بۋعان، ول ءۇشىن اسحانا پىشاعىن پايدالانعان.

13 شىلدە كۇنى تۇستە جىبەك جولى اۋىلىندا ءوز ءۇيىنىڭ اۋلاسىندا ويناپ جۇرگەن بەس جاسار قىزدان اتا-اناسى ءاپ-ساتتە كوز جازىپ قالعان. قىزدى اۋەلى تۋىستارى، كەيىننەن بۇكىل اۋىل ىزدەپ شىعىپ، كەشكە كورشىسىنىڭ ءۇيىنىڭ شاتىرىنان ءولى كۇيىندە تاپقان. بۇل سۋىق حابار اۋىلدى ءدۇر سىلكىندىرىپ، اشۋ-ىزاعا بۋلىققان تۇرعىندار كۇدىكتىنى وزدەرىنە بەرۋدى تالاپ ەتىپ جينالعان. اۋىلعا پوليتسيا كىرگىزىلىپ، ەكى كۇن ينتەرنەت اجىراتىلعان.

بەس جاسار قىزدى تۋىستارى مەن اۋىلداستارى 14 شىلدە كۇنى تۇستە جەرلەدى. كۇدىكتى رەتىندە ۇستالعان كورشىسىنىڭ ءۇيىن ورتەيمىز دەگەن اشۋلى جۇرتتىڭ الدىن پوليتسيا بوگەگەن. جينالعاندار كۇدىكتىنى وزدەرىنە بەرۋدى تاعى تالاپ ەتىپ، ىزدەۋ كەزىندە پوليتسيانىڭ ارەكەتسىزدىگىن ايتىپ، كىنالاعان.

اكەسى قىزىن تاپقاندا "ساۋ-تامتىعى قالماعانىن، ويىنا كەلگەنىن ىستەپ، جەتى-سەگىز جەرىنەن پىشاقتاپ، اسقان جاۋىزدىقپەن ولتىرگەنىن" ايتقان.

وسى كۇنى تۇركىستان وبلىستىق پوليتسيا دەپارتامەنتىنىڭ ءباسپاسوز قىزمەتى قىلمىستىق كودەكستىڭ 99-بابى ("ادام ءولتىرۋ") بويىنشا ءىس قوزعالىپ، تەرگەۋ باستالعانىن حابارلاعان.

قازاقستان پرەزيدەنتى قاسىم-جومارت توقاەۆ باس پروكۋراتۋرا مەن ىشكى ىستەر مينيسترلىگىنە ساراعاشتاعى بەس جاسار قىزدىڭ ولىمىنە بايلانىستى وقيعانىڭ ءمان-جايىن مۇقيات تەكسەرۋدى تاپسىرعان.

اقوردانىڭ مالىمەتىنشە، كۇدىكتى بۇعان دەيىن كىسى ولتىرگەنى ءۇشىن 10 جىلعا سوتتالعان. بيىل سوت "ادام دەنساۋلىعىنا قاساقانا اۋىر زيان كەلتىرگەنى ءۇشىن" كۇدىكتىنىڭ بوستاندىعىن 3 جىلعا شەكتەگەن.

14 شىلدە كۇنى كەشكە باس پروكۋراتۋرا اتالعان ۇكىمگە جازانى قاتاڭداتۋ جانە باس بوستاندىعىنان ايىرۋ تاعايىنداۋ تۋرالى كاسساتسيالىق نارازىلىق كەلتىرگەنىن مالىمدەدى. پروباتسيا قىزمەتى قىزمەتكەرلەرىنە قاتىستى سالعىرتتىق فاكتىسى بويىنشا تەرگەۋ باستالعانىن حابارلادى.

ء“بىز ەكى باپپەن ءىس قوزعاۋدان بولەك بۇدان بۇرىن اۋىر قىلمىس جاساعان ادامنىڭ جازاسىن جەڭىلدەتىپ، بوستاندىققا جىبەرگەن سۋديالاردى جۇمىستان بوساتۋدى جانە جازالاۋدى سۇرايمىز" دەدى قايتىس بولعان بالانىڭ تۋىستارى ازاتتىققا.

جىبەك جولى اۋىلىندا ينتەرنەت جەلىسى 15 شىلدە كۇنى تۇستە قايتا قوسىلعان. 16 شىلدە كۇنى پوليتسيا اۋىلدان شىعارىلعان.

Abai.kz