ەكىباستۇز ىرگەسىندەگى دالا ورتىنەن الكەي مارعۇلان اۋىلىندا 73 باس ۇساق مال شىعىنى بولدى. بۇل تۋرالى پاۆلودار وبلىسىنىڭ اكىمى اسايىن بايحانوۆ ءوزىنىڭ الەۋمەتتىك جەلىدەگى رەسمي پاراقشاسىندا جازدى.

«كەشە دالا ورتتەرى ورىن العان باياناۋىل، ماي اۋداندارى جانە ەكىباستۇزدىڭ اۋىلدىق ايماقتارىنا باردىم. شارۋا قوجالىقتارىنىڭ باسشىلارىمەن كەزدەسىپ، ماسەلەلەردىڭ شەشۋ جولدارىن بىرلەسىپ تالقىلادىق»، - دەپ جازادى وبلىس اكىمى اسايىن بايحانوۆ ءوزىنىڭ ءىnstagram پاراقشاسىندا.

اكىمنىڭ مالىمەتىنە ساي، شارۋالارعا 4 باعىتتا كومەك كورسەتىلەدى:

- شابىندىق ءۇشىن ارزانداتىلعان ديزەل وتىنىنىڭ كولەمى 4 مىڭ توننادان 10 مىڭ تونناعا دەيىن ارتادى

- جەمشوپ دايىنداۋ ءۇشىن سۋبسيديا كولەمى ءبىر باس ىقم ءۇشىن 7 مىڭنان 15 مىڭ تەڭگەگە دەيىن جانە ۇساق مال ءۇشىن 3 مىڭنان 5 مىڭ تەڭگەگە دەيىن ارتادى

- مۇقتاج فەرمەرلەرگە قور ساناتى، مەملەكەتتىك ورمان قورى جانە جايىلما ۋچاسكەلەرىندە ءشوپ دايىنداۋعا مۇمكىندىك بەرەمىز;

- ءداندى داقىل جيناۋ كەزىندە سابان دايىنداۋدى قاراستىراتىن بولامىز، جيناۋعا مۇمكىندىك بولاتىنداي، سابان ۇساقتالماي ەگىستىكتەردە قالدىرىلادى.

«سونداي-اق، ءورت سالدارىنان 73 باس ۇساق مال (50 ەشكى جانە 23 قوي) جانىپ كەتكەن الكەي مارعۇلان اۋىلىنىڭ تۇرعىندارىنا كەلتىرىلگەن شىعىندى وتەۋ ءۇشىن ءوڭىردىڭ ءىرى كاسىپورىندارىمەن ماتەريالدىق قولداۋ كورسەتىلەتىن بولادى. سونىمەن قاتار، جازعى ءۇيى مەن مالعا ارنالعان قورشاۋى زارداپ شەككەن ەكى شارۋاشىلىققا دا ءدال وسىنداي كومەك كورسەتىلەدى»، - دەپ ءمالىم ەتتى اسايىن بايحانوۆ.

ەسكە سالايىق، 13 شىلدەدە ەكىباستۇزداعى دالا ورتىنەن شارۋا قوجالىعىنىڭ ۇساق مالدارى تىرىدەي جانىپ، كەيبىرىن كۇيىك شالعانى حابارلانعان.

Abai.kz