قورعانىس مينيسترلىگى مەن تۇرىكتىڭ «Otokar» كومپانياسى اراسىندا 2 ترلن تەڭگەگە جۋىق سوماعا بروندى تەحنيكا ساتىپ الۋعا كەلىسىم جاسالعان جوق. ۆەدومستۆو اتالعان اقپارات شىندىققا سايكەس كەلمەيتىنىن مالىمدەدى.

«بۇگىنگى تاڭدا تۇرىك تاراپىمەن بروندى تەحنيكانى جەتكىزۋ بويىنشا ەشقانداي كەلىسىم جوق. «Otokar» كومپانياسى - بروندى تەحنيكا وندىرۋشىلەردىڭ ءبىرى عانا، ونىڭ ۇلگىلەرى قىزمەتكە قابىلداۋ ەرەجەلەرىندە بەكىتىلگەن راسىمگە سايكەس جالپى نەگىزدە قارالادى. بۇل تۋرالى قورعانىس مينيسترلىگى بۇعان دەيىن حابارلاعان بولاتىن. بۇل رەتتە تەحنيكانىڭ باسقا دا شەتەلدىك ۇلگىلەرى قاراستىرىلادى» دەيدى مينيسترلىك.

قازىرگى ۋاقىتتا اتالعان كومپانيانىڭ 8ح8 بروندى تەحنيكاسىنىڭ ۇلگىسى وتاندىق بروندى تەحنيكانىڭ ۇلگىسىمەن قاتار تاجىريبەلىك سىناقتان ءوتىپ جاتىر.

ونىڭ ناتيجەسى بويىنشا تەحنيكالىق تالاپتارعا ساي تەحنيكانىڭ ۇلگىسى ايقىندالادى.

ەستەرىڭىزگە سالا كەتەيىك، قورعانىس مينيسترلىگى ءوز قۇزىرەتى شەڭبەرىندە مەملەكەتتىڭ قورعانىس قابىلەتىنە جاۋاپ بەرەدى جانە قارۋ-جاراق پەن اسكەري تەحنيكانىڭ ءارتۇرلى ۇلگىلەرىنە قاجەتتىلىك بار.

بۇل رەتتە قورعانىس ۆەدومستۆوسى ءۇشىن ۇلگىلەردى تاڭداۋ كەزىندە وتاندىق جانە حالىقارالىق ساراپشىلار مويىنداعان ءونىمنىڭ ساپاسىنا باسىمدىق بەرىلەدى.

«سوندىقتان الەۋمەتتىك جەلىلەردە تارالاتىن ءارتۇرلى جالعان اقپاراتتارعا سۇيەنبەي، تەك تەكسەرىلگەن، رەسمي اقپارات كوزدەرىنە سەنۋدى سۇرايمىز» دەيدى ۆەدومستۆودان.

ايتا كەتەيىك، كەشە تۇركيا مەن وتاندىق باق بەتتەرىندە قازاقستان اسكەرى تۇركيالىق «Otakar» كومپانياسىنان 4,4 ملرد دوللارعا (2 ترلن تەڭگە) 800-دەن استام ARMA بروندى كولىكتەرىن ساتىپ الۋدى جوسپارلاپ وتىرعانى تۋرالى مالىمەت تاراعان ەدى.

Abai.kz