جوعارعى سوت تاراپىنان بيىل مامىر ايىندا كامەلەتكە تولماعان قىزدى ولتىرگەن كۇدىكتىگە قاتىستى زاڭسىز ۇكىم شىعارۋ فاكتىسى بويىنشا قىزمەتتىك تەكسەرۋ جۇرگىزىلدى، دەپ جازادى Halyq-uni.

ناتيجەسىندە تۇركىستان وبلىسى سارىاعاش اۋداندىق سوتىنىڭ توراعاسىن قىزمەتىنەن بوساتۋ تۋرالى ماسەلە قوزعالدى.

ايتا كەتەيىك، سوت اۋىلداسىن بالتامەن ۇرىپ دەنساۋلىعىنا اۋىر زيان كەلتىرگەن تۇرعىنعا 3 جىلعا باس بوستاندىعىن شەكتەۋ تۋرالى ۇكىم شىعارعان. ونىڭ بۇعان دەيىن كىسى ءولتىرىپ، 10 جىل تۇرمەدە وتىرعانى ەسكەرىلمەگەن. كەيىن ءدال سول ادام 5 جاسار قىزدى جاۋىزدىقپەن ءولتىردى.

نۇرقازى شەتەنوۆ 2020 جىلدىڭ قازان ايىندا سارىاعاش اۋداندىق سوتىنىڭ توراعاسى قىزمەتىنە تاعايىندالدى.

ول ەڭبەك جولىن وڭتۇستىك قازاقستان وبلىستىق ىشكى ىستەر ورگاندارىندا 1995 جىلى باستاپ 2004 جىلدارى ارالىعىندا ۋچاسكەلىك پوليتسيا ينسپەكتورى، انىقتاۋشى، تەرگەۋشى، اعا تەرگەۋشى، وقو التىنشى باسقارماسىنىڭ، ەسىرتكى ساۋداسىنا قارسى كۇرەس باسقارمالارىندا جەدەل ۋاكىل قىزمەتتەرىن اتقارعان.

2004-2007 جىلدارى ارالىعىندا وقو، قازىعۇرت اۋدانى اكىمىنىڭ زاڭ كەڭەسشىسى، 2007-2010 جىلدارى ارالىعىندا «بەيبارس ي ك»، «تولەبي مۇناي گاز» جشس-دە زاڭگەر قىزمەتتەرىن اتقارعان.

2010-2016 جىلدار ارالىعىندا وقو، سايرام اۋداندىق سوتىنىڭ سۋدياسى لاۋازىمىن اتقارعان.

2016-2020 جىلدارى ارالىعىندا سوزاق اۋداندىق سوتىنىڭ توراعاسى لاۋازىمىن اتقارعان.

Abai.kz