مەكەمە مالىمەتىنە قاراعاندا، ول جەر تەلىمدەرىن بەرۋدە جانە نىسانداردىڭ قۇرىلىسىنا كەلىسىم بەرۋدە قىزمەتىن اسىرا پايدالانعان دەگەن كۇدىككە ىلىنگەن.
رەسمي مالىمدەمەدە كۇدىكتىنىڭ اتى-ءجونى ايتىلماعان. بىراق جەرگىلىكتى باسىلىمدار الماتىنىڭ ارحيتەكتۋرا جانە قالانى قۇرۋ باسقارماسىندا 20 جىلعا جۋىق ىستەگەن الماسحان احمەدجانوۆ ۇستالعانىن جازىپ جاتىر.
تەرگەۋ مالىمەتىنە سايكەس، كۇدىكتى 2020-2023 جىلدارى جەكە ۇيلەر قۇرىلىسى سالىنۋى كەرەك جەر تەلىمدەرىن كوپ قاباتتى ءۇش تۇرعىن ءۇي كەشەنىن سالۋعا زاڭسىز كەلىسىم بەرگەن.
تەرگەۋ "جەر تەلىمدەرىنىڭ كاداسترلىق باعاسى تولەنبەگەنىن" بەلگىلەپ، مەملەكەتكە كەلتىرگەن زياندى 307 ميلليون تەڭگەگە باعالاپ جاتىر.
كوررۋپتسياعا قارسى كۇرەس قىزمەتى كۇدىكتى تەرگەۋ اياقتالعانعا دەيىن قاماۋعا الىنعانىن مالىمدەدى. قازىر بۇل ىسكە "باسقا قىزمەت ادامدارىنىڭ" قاتىسى بار-جوعى تەكسەرىلىپ جاتىر.
الماسحان احمەدجانوۆ الماتىنىڭ ارحيتەكتۋرا جانە قالانى قۇرۋ باسقارماسىنىڭ (كەيىن قالانى جوسپارلاۋ جانە ۋربانيستيكا باسقارماسى بولىپ وزگەردى) جەتەكشىسى قىزمەتىنە 2018 جىلى جەلتوقساندا تاعايىندالعان. ول قىزمەتتە 31 مامىرعا دەيىن ىستەگەن.
2 شىلدەدە اكىمشىلىك سايتىندا اتالعان باسقارما جەتەكشىسىنىڭ مىندەتىن اتقارۋشى بولىپ نۇرلان بورانباەۆ تاعايىندالعانى تۋرالى مالىمەت جاريالاندى.
Abai.kz
