قازاقستانعا كەلۋشىلەر سانى كەتۋشىلەر سانىنان اسىپ كەتتى. سوڭعى رەت وسىنداي كورسەتكىش 2014 جىلى بولعان.

2023 جىلدىڭ قاڭتار-ناۋرىز ايلارىندا قازاقستانعا كەلگەندەردىڭ سانى (7700 ادام) كەتۋشىلەردەن بىردەن 5000 ادامعا كوپ بولدى، دەپ جازادى Ranking. kz.

2014 جىلى وسىنداي جاعداي قالىپتاسىپ، كەلگەندەر سانى كەتكەندەر سانىنان 789 ادامعا ارتىق بولعان. سودان بەرى ەلدەن كەتكەندەردىڭ سانى كەلگەندەردىڭ سانىنان اسىپ ءتۇسىپ وتىردى. مىسالى، 2020 جىلى – 3000 ادامعا، 2021 جىلى – 3400 ادامعا، 2022 جىلى – 1200 ادامعا كوپ بولعان.

وسى جىلدىڭ ءبىرىنشى توقسانىندا ەڭ كوپ كەتكەندەردىڭ سانى قوستاناي (488 ادام), قاراعاندى (263) جانە سولتۇستىك قازاقستان (253) وبلىستارىنا تيەسىلى.

ەگەر 2022 جىلدىڭ العاشقى ءۇش ايىندا قازاقستانعا 810 رەسەيلىك كەلسە، بيىلعى جىلدىڭ وسى كەزەڭىندە 3900 رەسەيلىك كەلگەن. سونداي-اق، ميگرانتتار وزبەكستاننان (1900) جانە تۇركىمەنستاننان (362) كوپ كەلەدى.

رەسەيگە ءبىر جىل بۇرىن 4100 ادام كەتسە، بيىل تەك 1700 ادام عانا كەتتى. ءوز كەزەگىندە قازاقستاندىقتار گەرمانياعا (501), پولشاعا (128), اقش-قا (64) كوپ قونىس اۋدارادى.

ايتا كەتسەك، بۇعان دەيىن رەسەيلىك سپورتشىلاردىڭ قازاقستان ازاماتتىعىن كوپتەپ الىپ جاتقانىن جازعان ەدىك.

«قازاقستانعا 10 سپورتشى كوشىپ كەلىپ، ازاماتتىعىن اۋىستىرعان. ال 204 سپورتشى سپورتتىق ازاماتتىعىن وزگەرتكەن نەمەسە وزگەرتۋگە نيەتتى. بۇل كورسەتكىش سپورت ازاماتتىعىن وزگەرتۋ تۋرالى حابارلامالاردى، جارىسقا قاتىسۋشىلار تۋرالى اشىق دەرەكتەردى، سونداي-اق سپورت فەدەراتسيالارىنىڭ تىزىمدەرىن ساراپتاي وتىرىپ جاسالدى»،- دەلىنگەن حابارلامادا.

سوعىس باستالعان ساتتەن باستاپ رەسەيدىڭ 200-دەن استام سپورتشىسى وزگە ەل ازاماتتىعىن العان.

2022–2023 جىلدارى 141 رەسەيلىك شاحماتشى ازاماتتىعىن اۋىستىرعان. ونىڭ ىشىندە تانىمال كيريلل الەكسەەنكو، ەۆگەني رومانوۆ، الەكساندر موتىلەۆ، الەكسەي سارانا، الەكساندرا كوستەنيۋك پەن الينا كاشلينسكايا دا بار.

مانەرلەپ سىرعاناۋشىلار اراسىندا گلەب سمولكين، ديانا دەۆيس، سوفيا شيفرينا، ات سپورتىنان ەكاتەرينا دۋبروۆينا، ەليزاۆەتا مينينا مەن الينا سۆەردلوۆا باسقا ەلدىڭ ازاماتتىعىن العان. رەسەي تەننيسى دە ءبىراز تالانتتى سپورتشىلارىنان ايىرىلدى. باسقا ەلدىڭ ازاماتتىعىن تاڭداعاندار اراسىندا ەلەنا رىباكينا، ۆارۆارا گراچەۆا، ناتەلا دزالاميدزە بار.

جالپى رەسەيلىك سپورتشىلار ەڭ كوپ كەتكەن ەل يزرايل سانالادى. 25 رەسەيلىك سپورتشى ەندى يزرايل تۋىنىڭ استىندا ونەر كورسەتۋدە. ەكىنشى ورىندى سەربيا يەمدەنۋدە. سەربياعا 19 سپورتشى كەتكەن. ارتىنشا گەرماني – 13, فرانتسيا - 12 سپورتشى، پولشا – 11, قازاقستان – 10 رەسەيلىك سپورتشىدان قابىلداعان. ۇلىبريتانيا مەن اقش، كانادا جانە يسپانيا ازاماتتىعىن العان رەسەيلىك سپورتشىلار دا جەتەرلىك. جاقىندا رەسەيلىك تانىمال تەننيسشى ميرا اندرەەۆانىڭ وزگە ەل ازاماتتىعىن الاتىنى حابارلاندى. ول فرانتسياعا كەتپەك.

قازاقستان قۇراماسىنا اۋىسۋعا ءوتىنىش بىلدىرگەندەر قاتارىندا كونكيمەن جۇگىرۋدەن الەم چەمپيوناتىنىڭ التى دۇركىن قولا جۇلدەگەرى ەليزاۆەتا گولۋبەۆا مەن رەسەي چەمپيونى كريستينا سيلاەۆا دا بار.

فوتو: عالامتوردان

Abai.kz