پرەزيدەنتكە ەلىمىزدە سىبايلاس جەمقورلىققا قارسى ءىس-قيمىل بويىنشا قابىلدانىپ جاتقان شارالار تۋرالى سىبايلاس جەمقورلىققا قارسى قىزمەتتىڭ ەسەبى بەرىلدى.

انتيكور باسشىسى اسحات جۇماعاليدىڭ ايتۋىنشا، سىبايلاس جەمقورلىق تاۋەكەلدەرىنە سىرتتان تالداۋ جۇرگىزۋ كەزىندە جەردى ءبولۋ جانە الماتىنىڭ قالا قۇرىلىسىن دامىتۋ ءىسىن جوسپارلاۋ بارىسىندا ءجيى قايتالاناتىن زاڭ بۇزۋشىلىقتارعا جول بەرىلگەنى انىقتالدى.

سونىمەن قاتار كەزدەسۋدە مەملەكەت باسشىسىنا ءبىلىم بەرۋ سالاسىنداعى بيۋدجەتتىك وتىنىمدەردى ازىرلەۋ تەتىكتەرىنىڭ جەتىلدىرىلمەگەنىنە، قىزمەتكەرلەردى ءبىر ورتالىقتان ەسەپكە الۋدىڭ بولماۋىنا جانە قارجى جىمقىرۋعا اكەپ سوقتىرعان بۋحگالتەرلىك جۇيەلەردىڭ قازىناشىلىقتاعى دەرەكتەر بازاسىمەن بىرىكتىرىلۋىنە بايلانىستى تاۋەكەلدەر انىقتالعانى جونىندە اقپارات بەرىلدى.

پرەزيدەنت بۇل سالاداعى سىبايلاس جەمقورلىق فاكتىلەرىنىڭ الدىن الۋ ماڭىزدى ەكەنىن جانە پروتسەستەردى تسيفرلاندىرۋ قاجەتتىگىن ەرەكشە اتاپ ءوتتى.

قاسىم-جومارت توقاەۆقا بيىلعى 6 ايدا 130 نىسانعا تالداۋ جانە مونيتورينگ جۇرگىزىلگەنى، جەمقورلىقتى جويۋعا قاتىستى 1 مىڭنان استام ۇسىنىس ەنگىزىلگەنى تۋرالى مالىمەت بەرىلدى.

بۇدان بولەك، اسحات جۇماعالي قاسىم-جومارت توقاەۆقا سىبايلاس جەمقورلىققا قاتىستى بىرقاتار زاڭ بۇزۋشىلىقتىڭ، سونىڭ ىشىندە وليگوپوليا وكىلدەرى جاساعان زاڭسىز ارەكەتتەردىڭ جولىن كەسۋ، سونداي-اق كەلتىرىلگەن شىعىنداردى وتەۋ جانە اكتيۆتەردى قايتارۋ شارالارى تۋرالى باياندادى.

جىل باسىنان ەلىمىزدە 1 مىڭعا جۋىق سىبايلاس جەمقورلىققا قاتىستى قىلمىس تىركەلدى، 700-دەن استام ادام اشكەرەلەندى، ونىڭ 98-ءى ءتۇرلى دەڭگەيدەگى باسشىلار.

“سوتقا دەيىنگى اياقتالعان تەرگەۋ امالدارىنىڭ ناتيجەسى بويىنشا 232,6 ميلليارد تەڭگە وتەلدى. جالپى، 1,5 جىلدا بيۋدجەتكە جانە كۆازيمەملەكەتتىك سەكتور سۋبەكتىلەرىنە شامامەن 860 ميلليارد تەڭگە كولەمىندە مۇلىكتىك اكتيۆتەر مەن اقشالاي قاراجات قايتارىلدى”، – دەلىنگەن حابارلامادا.

كەزدەسۋ سوڭىندا قاسىم-جومارت توقاەۆ سىبايلاس جەمقورلىققا قارسى جۇيەلى جۇمىستاردى جالعاستىرۋدى، اسىرەسە الەۋمەتتىك ماڭىزى بار سالالارعا باسا ءمان بەرۋدى تاپسىردى. سونداي-اق الدىن الۋ شارالارىنىڭ اسا ماڭىزدى ەكەنىن ايتتى.

Abai.kz