قازاقستاننان ەۋروپا وداعى ەلدەرىنە باراتىن ازاماتتارعا ۆيزالىق رەجيم جەڭىلدەۋى مۇمكىن.

«قر پرەمەر-ءمينيسترىنىڭ ورىنباسارى–سىرتقى ىستەر ءمينيسترى مۇرات نۇرتىلەۋدىڭ 14-15 مامىردا بەلگياعا جۇمىس ساپارى بارىسىندا ەۋروپا وداعىنىڭ جوعارى دەڭگەيدەگى لاۋازىمدى تۇلعالارىمەن كەزدەسۋلەر بولدى. ونىڭ قورىتىندىسى نەگىزىندە قازاقستاندىقتار ءۇشىن ۆيزالىق جەڭىلدەتۋدى ىسكە اسىرۋ بويىنشا كونسۋلتاتسيالاردى باستاۋ تۋرالى ۋاعدالاستىققا قول جەتكىزىلدى»، - دەلىنگەن قازاقستان سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن جاۋابىندا.

23 مامىردا سىرتقى ىستەر مينيسترلىگىنىڭ عيماراتىندا وتكەن «قازاقستان رەسپۋبليكاسى – ەۋروپا وداعى» ىنتىماقتاستىق كوميتەتىنىڭ 20-شى وتىرىسى اياسىندا ەۋروپا وداعىنىڭ نازارىنا اتالعان ۋاعدالاستىققا سايكەس رەسمي كونسۋلتاتسيالاردى باستاۋعا قازاقستان جاعى دايىن ەكەنى تۋرالى اقپارات بەرىلدى.

«ەندى ەۋروپالىق تاراپتان ۆيزالىق رەجيمدى جەڭىلدەتۋ الگوريتمى مەن تەتىگى بويىنشا ءتيستى جاۋاپ بەرىلمەك. بۇل تۇرعىدا كەلىسسوزدەر جالعاسىپ جاتىر»، - دەپ اتالىپ وتكەن مينيسترلىك مالىمەتىندە.

بۇدان بۇرىن حابارلانعانداي، بيىل مامىر ايىندا قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ بريۋسسەلگە جۇمىس ساپارى اياسىندا ىشكى ىستەر بويىنشا ەۋروپالىق كوميسسار يلۆا يوحانسسونمەن كەزدەسۋ وتكىزدى.

كەلىسسوزدەر ناتيجەسىندە تاراپتار قازاقستان ازاماتتارى ءۇشىن ۆيزالىق رەجيمدى جەڭىلدەتۋ تۋرالى رەسمي كونسۋلتاتسيالاردى باستاۋ جونىندە ۋاعدالاستىققا قول جەتكىزدى.

اتاپ ايتقاندا، قازاقستان 30-دان استام مەملەكەتپەن ۆيزالىق رەجيمدى جەڭىلدەتۋ كەلىسسوزىن جالعاستىرىپ جاتىر.

Abai.kz