الماتى گارنيزونىنىڭ اسكەري سوتىندا قاڭتار وقيعاسى كەزىندە كامەلەتكە تولماعان ايكوركەم مەلدەحاننىڭ ولىمىنە اكەپ سوقتىرعان قىلمىستىق ءىس قارالىپ جاتىر. سوت وتىرىسى 26 شىلدەگە جوسپارلانعان، دەپ حابارلايدى Ulysmedia.kz.

باس اسكەري پروكۋراتۋرا مالىمەتىنشە، پروتسەستىڭ ءوزى ءىس ماتەريالدارىندا جارياعا جاتپايتىن قۇپيا قۇجاتتاردىڭ بولۋىنا بايلانىستى جابىق رەجيمدە وتەدى.

“قورعانۋ تاراپى دا، جابىرلەنۋشى تاراپ تا ءتيىستى زاڭ كومەگىمەن قامتاماسىز ەتىلگەن، قورعاۋشىلارى بار. قىلمىستىق پروتسەسكە قاتىسۋشىلاردىڭ ارىزى بويىنشا ولارعا مەملەكەتتىك قۇپيالارعا رۇقسات رەسىمدەلگەن. سونداي-اق، قايتىس بولعان كامەلەتكە تولماعان ايكوركەم مەلدەحاننىڭ اكەسى ايدوس مەلدەحانعا مەملەكەتتىك قۇپيالارعا رۇقساتتى راسىمدەۋ بىرنەشە رەت ۇسىنىلدى. الايدا، ايدوس مەلدەحان رۇقسات جاساۋدان باس تارتتى. وعان مەملەكەتتىك قۇپيالارعا رۇقسات بەرۋدەن باس تارتۋدىڭ سالدارى ەسكەرتىلدى”، – دەلىنگەن حابارلامادا.

ايىپتاۋ اسكەري قىزمەتشى ا.جۇماننىڭ ءىس-ارەكەتىنىڭ زاڭسىزدىعىن راستايتىن قىلمىستىق ءىس ماتەريالدارىنا تىركەلگەن (كۋاگەرلەردىڭ ايعاقتارى، ساراپتامالاردىڭ قورىتىندىلارى جانە باسقا دا دالەلدەمەلەر) دالەلدەرمەن قاتاڭ نەگىزدەلەتىنى اتاپ ءوتىلدى.

قازىرگى ۋاقىتتا باستى سوت تالقىلاۋى تاعايىندالدى، ونىڭ بارىسىندا بارلىق جينالعان دالەلدەمەلەر زەرتتەلىپ، باعا بەرىلەدى.

پروكۋراتۋرا سوت تالقىلاۋىنىڭ بارىسى تۋرالى جۇرتشىلىق جاريا ەتۋگە رۇقسات ەتىلگەن كولەمدە حاباردار ەتىلەتىنىن اتاپ ءوتىپ، تەك رەسمي دەرەككوزدەرگە سەنۋگە شاقىردى.

ايتا كەتەيىك، بۇدان بۇرىن قاڭتاردا قازۇۋ رەكتورىنىڭ ۇلىن اتىپ ولتىرگەن اسكەري قىزمەتكەرگە ۇكىم شىققان.

سونداي-اق، تالدىقورعاندا قاڭتار وقيعاسى كەزىندە وققا ۇشقان سەيىتقۇلوۆتار وتباسىنىڭ ولىمىنە كىنالى دەپ ايىپتالعان اسكەري قىزمەتكەر سوتتالدى.

سەيىتقۇلوۆتار وتباسى 2022 جىلدىڭ 8 قاڭتارىندا قازا تاپتى. اسكەريلەر نۇربولات سەيىتقۇلوۆ، ونىڭ جارى التىناي ەتاەۆا مەن 15 جاستاعى قىزى نۇراي مىنگەن كولىككە وق جاۋدىرعان. ۇشەۋى وقيعا ورنىندا كوز جۇمعان. دانيار ەگەمباەۆ نۇربولات پەن قىزىنىڭ ولىمىنە قاتىستى كۇدىكتى دەپ تانىلعان. التىناي ەتاەۆانىڭ ولىمىنە بايلانىستى ءىس جەكە وندىرىسكە شىعارىلعان.

Abai.kz