بۇگىندە پاۆلودار مۇناي-حيميا زاۋىتىنىڭ (پمحز) بارلىق قوندىرعىسى كۇردەلى جوندەۋدەن كەيىن قالىپتى تەحنولوگيالىق رەجيمدە جۇمىس ىستەپ تۇر. ءوندىرىس ورنى جوسپارلانعان مەرزىمنەن ەرتە، ياعني، 4 كۇن بۇرىن تولىق ىسكە قوسىلدى.

«پمحز» جشس شيكى مۇناي وڭدەۋ كولەمىن تاۋلىگىنە 15 مىڭ تونناعا دەيىن ارتتىردى. نەگىزگى ونىمدەر (ديزەل وتىنى، بەنزين، بيتۋم، مۇناي كوكسى جانە سۇيىتىلعان گاز) شتاتتىق رەجيمدە جونەلتىلىپ جاتىر.

ونەركاسىپتە قاۋىپسىزدىكتى قامتاماسىز ەتۋ ەرەجەسىنە ساي جوسپارلى جوندەۋ جۇمىستارى كەزىندە جابدىقتارعا رەۆيزيا جاسالىپ، تەحنيكالىق كۋالاندىرۋ وتكىزىلدى. كاسىپورىننىڭ سەنىمدى ءارى توقتاۋسىز جۇمىسىن قامتاماسىز ەتۋ ماقساتىندا سىيىمدىلىق، سورعى، جىلۋ الماسۋ جابدىقتارى، تەحنولوگيالىق پەشتەردىڭ قۇبىرلارى، تەحنولوگيالىق قۇبىرلاردىڭ بولىكتەرى، سونداي-اق، نورماتيۆتىك قىزمەت مەرزىمى وتكەن كاتاليزاتور مەن ادسوربەنتتەر اۋىستىرىلدى.

جوسپارعا ساي باياۋ كوكستەۋ قوندىرعىسىنىڭ ءتۇتىن شىعاراتىن قۇبىرى اۋىستىرىلدى. بيتۋم وندىرەتىن قوندىرعىنىڭ ءتۇتىن شىعاراتىن قۇبىرىنىڭ ەلەمەنتتەرى جوندەۋدەن ءوتتى. بۇدان باسقا، وندىرىسكە قاجەتتى ماڭىزدى ەلەكتر جابدىقتارى دا اۋىستىرىلدى.

سونىمەن قاتار جول بيتۋمىنىڭ تاۋلىكتىك ءوندىرىسىن 15%-عا ارتتىرۋدى كوزدەيتىن وزگە دە جۇمىستار اتقارىلدى. ال «قازمۇنايگاز» ۇك اق-نىڭ ءۇش جىلدىق جوندەۋارالىق كەزەڭگە شىعۋ جونىندەگى باستاماسى اياسىندا تەحنولوگيالىق قوندىرعىلاردى قوسارلاۋشى ساقتاندىرۋ كلاپاندارىمەن قوسىمشا جابدىقتاۋدىڭ ءبىرىنشى كەزەڭى ورىندالدى.

جوسپارلى تۇردە جانە الدىن الا جۇرگىزىلگەن جوندەۋ جۇمىستارىنا مەردىگەر ۇيىمداردىڭ 1 600 مامانى، سونداي-اق، ارنايى تەحنيكانىڭ 49 بىرلىگى (اۆتوكراندار، اۆتوكوتەرگىشتەر) تارتىلدى.

فوتو: اشىق دەرەككوزدەن

Abai.kz