ءوز ەركىمەن ەلگە كەلىپ ۇستالعان ءابليازوۆتىڭ سىبايلاسى ءارى ناعاشى اعاسى قۋانىش نۇرگازين 12 جىلىن شەتەلدە وتكىزدى. دەنساۋلىعىنان ابدەن ايىرىلعان ول جىلىنا وزگە ەلدە بىرنەشە رەت اۋرۋحاناعا دا جاتقانىن دا جەتكىزدى، دەپ حابارلايدى Almaty تەلەارناسى.

73 جاستاعى قۋانىش نۇرعازين ەسىمدى بۇل كىسىنى كەزىندە مۇحتار ءابليازوۆ 2007 جىلى BSC كومپانياسىنىڭ نومينالدى ديرەكتورى ەتىپ تاعايىندايدى. باس پروكۋراتۋرانىڭ مالىمەتىنە سايكەس، ءابليازوۆ جانە ونىڭ سىبايلاستارى وسى كومپانيانى زاڭسىز نەسيەلەندىرۋ ارقىلى بتا بانكتەن اسا ءىرى كولەمدە قاراجات جىمقىرعان. قۇزىرلى ورگان وكىلدەرى نۇرعازين سول كەزدە بۇل ىسكە قاتىسى بولا تۇرا ەشقايدا كەتپەۋ تۋرالى مىندەتتەمەنى بۇزىپ، قىلمىستىق جاۋاپكەرشىلىكتەن جالتارۋ ءۇشىن سوتتان جاسىرىنعانىن ايتادى. نۇرعازين وسىلايشا 2012 جىلى قازاقستاننان ليتۆاعا كەتىپ، وزگە ەلدە 12 جىل بويى بوسقىن مارتەبەسىمەن ءجۇرىپتى.

«2007-2009 جىلدار ارالىعىندا BSC كومپانياسىنىڭ ديرەكتورى بولدىم. ءبىز BSC كومپانياسى 152 ملن تەڭگە نەسيە العانبىز. ماعان نەسيە العاندا سىبايلاس بولدىڭ دەپ ايىپ تاعىلىپ وتىر»، – دەدى كۇدىكتى قۋانىش نۇرعازين.

سوت قۋانىش نۇرعازيندى مۇحتار ءابليازوۆتىڭ سىبايلاسى دەپ تانىپ، ونىڭ ۇستىنەن بولەك قىلمىستىق ءىس قوزعايدى. BSC كومپانياسىنىڭ ديرەكتورى قىزمەتىندە عانا تىركەلگەن ول ءىستىڭ وسىلايشا ناسىرعا ۇلاسىپ كەتەرىن بىلمەگەنىن ايتتى.

«مەن ىزدەۋدە جۇرگەنىمدى بىلگەن جوقپىن. 2014 جىلى اۋرۋحانادان شىعىپ كەلە جاتقانىمدا پوليتسيا ۇستادى. سول كەزدە ءتۇسىندىم. ماعان «بوسقىن» دەگەن اتاق بەردى. وسى ۋاقىتقا دەيىن ليتۆادا بولدىم»، – دەدى كۇدىكتى قۋانىش نۇرعازين.

وزگە ەلدە ءجۇرىپ، ونىڭ دەنساۋلىعى كۇرت ناشارلاعان. بىرنەشە كۇردەلى وتا جاساعان. سوزىلمالى اۋرۋعا شالدىققان. مۇنى سۇحبات بارىسىندا ءوزى ايتتى. ال سوڭعى 5 جىلدا جيەنىمەن بايلانىسى ۇزىلگەندىكتەن قارجىلاي قولداۋ دا بولماعان كورىنەدى. ايتا كەتەيىك، ول قازاقستانعا كەلۋ ءۇشىن ليتۆانىڭ ساياسي قامقورلىعىنان دا باس تارتقان ەكەن.

«مەنىڭ جيەنىم ءۇشىن 12 جىل شەتەلدە ءومىرىم ءوتتى. ول جەردە ەسەپتە تۇردىم. جىلىنا ەكى رەت اۋرۋحاناعا جاتتىم. دەنساۋلىعىما بايلانىستى كوپ وزگەرىس بولدى. جۇرەكتەن ەكى رەت ينفاركت الدىم. بۋىندارىمدى اۋىستىردى، ەكى يىعىم جىعىلعاننان ءۇزىلىپ كەتىپ، تىكتىردىم. شەتەلدە وتكەن 11 جىل ءومىرىم سول بالاعا بايلانىستى بولدى»، – دەدى كۇدىكتى قۋانىش نۇرعازين.

ارادا وسىنشا ۋاقىت وتكەننەن كەيىن نۇرعازين وتانىنا ءوز ەركىمەن كەلۋدى ۇيعارىپتى. ونىڭ ەلگە قايتۋىنا قازاقستانداعى دەموكراتيالىق وزگەرىستەر سەبەپ بولعان. ەندىگى ءومىرىن تۋعان جەرىندە بالالارى مەن نەمەرەلەرىنىڭ قاسىندا وتكىزۋدى جوسپارلاپ وتىر. 2023 جىلى 24 شىلدەدە ۇشاقپەن ليتۆادان ستامبۋل ارقىلى الماتى حالىقارالىق اۋەجايىنا كەلىپ قونادى. ءوزى سەكىلدى شەتەلدە قاشقىن اتانعاندارعا دا ايتارى بار.

«ەشقاشان ساياساتقا ارالاسپادىم. مەن وعان «سەن ارالاس، ارالاسپا» دەپ ايتا المايمىن. ول مەنى تىڭدامايدى. مەنىڭ ەركىم وزىمدە. جاڭا قازاقستان دەپ جاتىر عوي، دەموكراتيالىق وزگەرىستەر بولادى دەپ سەنەمىن. سوندىقتان ەلگە، جۇرتقا قايتۋدى شەشتىم. مەن شەتەلدە جۇرگەن قاشقىندارعا سوتتىڭ ءادىل شەشىمى بولاتىنىن ايتقىم كەلەدى. «وتان وتتان دا ىستىق». سوندىقتان قايتۋ كەرەك دەپ ەسەپتەيمىن»، – دەدى كۇدىكتى قۋانىش نۇرعازين.

ايتا كەتەيىك، قۋانىش نۇرعازين اۋەجايدان تۇسە سالا، ۋاقىتشا ۇستاۋ يزولياتورىنا قاماۋعا الىنعان بولاتىن. قازىر سوت شەشىمىمەن 2 اي مەرزىمگە ۇيقاماققا اۋىستىرىلدى. قۇزىرلى ورگان تەرگەۋ جۇمىستارى جالعاسىپ جاتقانىن حابارلادى. الداعى ۋاقىتتا سوت تالقىلاۋى قايتا باستالادى. ەندى ونىڭ قانداي جازا ارقالايتىنىن سوت ايقىندايدى.