كەيىن پروكۋروردىڭ ورىنباسارى ءوتىنىشتى قاناعاتتاندىرعان.

“جازباشا حاتتى ازىرگە المادىم. بىراق جۋىق ارادا الامىز دەپ ويلايمىن” دەدى بەيسەنبى كۇنى تۇستە عالىم نۇرپەيىسوۆ ازاتتىق تىلشىسىنە.

ول بۇگىن وسىنى دۋمان مۇحاممەدكارىمگە ايتۋ ءۇشىن تالدىقورعانعا بارعان. الايدا اشتىق جاريالاعانىنا 22 كۇن بولعان جۋرناليست دەنساۋلىعىنا بايلانىستى ادۆوكاتىنا شىعا الماعان. ول جازباشا جاۋاپتى قولعا المايىنشا جانە ءوزىن الماتىعا جىبەرمەيىنشە اشتىقتى توقتاتپايتىنىن ايتقان.

تالدىقورعانداعى تەرگەۋ يزولياتورىندا جاتقان قاماۋداعى جۋرناليست دۋمان مۇحاممەدكارىم ءوزىن الماتىعا اۋىستىرۋدا تالاپ ەتىپ، 5 شىلدەدە اشتىق جاريالاعان. ادۆوكاتتىڭ ايتۋىنشا، قازىر ءجۋرناليستىڭ جاعدايى وتە ناشار. مەكەمە كەزەكشىسى دارىگەرلەر ونىڭ جاعدايىن ءسات سايىن باقىلاپ وتىرعانىن ايتقان. كەزەكشىنىڭ ايتۋىنشا، وسىعان دەيىن دارىگەرلەر جۋرناليستكە ءۇش رەت كەلگەن، الايدا جۋرناليست ولاردىڭ ەمىنەن باس تارتقان.

دۋمان مۇحاممەدكارىم قىلمىستىق كودەكستىڭ "تىيىم سالىنعان ۇيىم ىسىنە ارالاسۋ" (405-باپ، 2-ءبولىم) جانە "ەكسترەميزمدى قارجىلاندىرۋ" (258-باپ، 1-ءبولىم) باپتارى بويىنشا كۇدىكتى دەپ تانىلعان. وعان مۇنداي ايىپتىڭ تاعىلۋىنا قۋعىنداعى ەكس-بانكير، وپپوزيتسيالىق ساياساتكەر مۇحتار ءابليازوۆتان العان سۇحباتى تۇرتكى بولعان.

جۋرناليستكە قىلمىستىق ءىس اشىلعانى بيىل 2 مامىردا بەلگىلى بولدى. ول كەزدە مۇحاممەدكارىم "بەيبىت جيىن ءتارتىبىن بۇزدى" دەگەن ايىپ بويىنشا اكىمشىلىك جازاعا تارتىلىپ، قاماۋدا وتىرعان ەدى.

اۋەلى ول 405-باپ بويىنشا قىلمىستىق ىستە "قورعانۋعا قۇقىعى بار كۋاگەر" اتاندى. كوپ ۇزاماي "ەكسترەميزمدى قارجىلاندىرۋ" بابى دا قوسىلىپ، ەكى ىستە دە كۇدىكتى ستاتۋسىنا ءوتتى. 22 ماۋسىمدا دۋمان مۇحاممەدكارىم تەرگەۋ سوتىنىڭ شەشىمىمەن ەكى ايعا قامالعان.