ازامات ساتىبالدى ش.ايمانوۆ اتىنداعى «قازاقفيلم» اق-نىڭ پرەزيدەنتى بولىپ تاعايىندالدى، دەپ حابارلايدى مادەنيەت جانە سپورت مينيسترلىگىنىڭ ءباسپاسوز قىزمەتى. 

كينوستۋديا ۇجىمىنا جاڭا باسشىنى مادەنيەت جانە سپورت ءمينيسترى اسحات ورالوۆ تانىستىردى.

مينيستر «قازاقفيلم» كينوستۋدياسىنىڭ جۇمىسىن ۇيلەستىرۋ ابىرويلى ءارى جاۋاپتى مىندەت ەكەنىن اتاپ ءوتتى.

«وتاندىق كينوونەرىنىڭ «قارا شاڭىراعى» سانالاتىن قازاقفيلم – اۋقىمدى جانە كۇردەلى وندىرىستىك ۇيىم. بىلتىر كينوستۋديا جانىنان «قازاقانيماتسيا» شىعارماشىلىق بىرلەستىگى قۇرىلدى. مەملەكەت باسشىسىنىڭ كينوستۋديا جۇمىسىن جاڭعىرتۋ جونىندەگى تاپسىرماسىن جۇزەگە اسىرۋ اياسىندا 87 تەحنيكالىق جابدىق ساتىپ الىندى. الداعى ۋاقىتتا، مودەرنيزاتسيانىڭ 2 كەزەڭىن باستاۋ كەرەك»،- دەدى اسحات ورالوۆ.

مادەنيەت جانە سپورت ءمينيسترى 2030 جىلعا قاراي جالپى كينوپروكاتتاعى وتاندىق فيلمدەردىڭ، ونىڭ ىشىندە انيماتسيالىق فيلمدەردىڭ ۇلەسىن 35% دەيىن ارتتىرۋ جوسپارلانىپ وتىرعانىن ءمالىم ەتتى. بۇل رەتتە پروكاتتاعى قازاق تىلىندەگى كارتينالاردىڭ ۇلەسىن 30% دەيىن جەتكىزۋ كوزدەلگەن.

ايتا كەتەيىك، ازامات ساتىبالدى ۇزاق ۋاقىت م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەڭبەك ەتتى، عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىن 3 جىل باسقاردى. بۇگىنگى دەيىن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى قىزمەتىن اتقاردى.

فوتو: اشىق دەرەككوزدەن

Abai.kz