قر ءىىم ەسىرتكى قىلمىسىنا قارسى ءىس-قيمىل دەپارتامەنتى پاۆلودار وبلىسىنىڭ پوليتسيا دەپارتامەنتىمەن بىرلەسىپ، جەدەل-تەرگەۋ ءىس-شارالارىن جۇرگىزۋ بارىسىندا قازاقستان ارقىلى وتكەن گەرويننىڭ ءىرى پارتياسى «ءترانزيتىنىڭ» جولىن كەستى، – دەپ حابارلايدى Polisia.kz.

– بيىلعى شىلدەدە پاۆلودار – ومبى باعىتىنداعى جولدا ارنايى جاساقتىڭ كومەگىمەن جۇك كولىگىن تىزگىندەگەن 54 جاستاعى قىرعىزستان ازاماتى ۇستالدى. جۇك كولىگىنى Volvo ماركالى تىركەمەسىندە قىرعىزستاننان رەسەيگە جەتكىزىلۋى ءتيىس قاربىزبەن قوسا، 59 كيلوگرامم «گەروين» سالىنعان 21 پوليەتيلەندى وراما جانە 10 كيلوگرامم «گاشيش» سالىنعان ەكى وراما انىقتالىپ، تاركىلەندى، – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى اسقار مۇحامەتقاليەۆ.

بۇل شامامەن 250 مىڭ ءبىر رەتتىك دوزا، ونىڭ قارا نارىقتاعى قۇنى 2,5 ميلليون دوللاردان اسادى. قر قك-ءنىڭ 286-بابى 4-بولىگى بويىنشا سوتقا دەيىنگى ءىس جۇرگىزۋ باستالدى (اينالىمنان الىنعان زاتتاردىڭ نەمەسە اينالىمى شەكتەلگەن زاتتاردىڭ كونترابانداسى). قىلمىستى ۇيىمداستىرۋشىعا مۇلكى تاركىلەنىپ، 20 جىلعا دەيىن باس بوستاندىعىنان ايىرۋ جازاسى كوزدەلەدى.

– قازىرگى ۋاقىتتا وسى ەسىرتكى قىلمىسىنىڭ وزگە قاتىسۋشىلارى مەن ۇيىمداستىرۋشىلارىن، سونداي-اق ەسىرتكى جەتكىزۋدىڭ باسقا دا ىقتيمال ارنالارىن انىقتاۋ بويىنشا جۇمىس جۇرگىزىلۋدە، – دەدى اسقار مۇحامەتقاليەۆ.

Abai.kz