قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بالالاردىڭ جاپپاي ۋلانۋ دەرەگى تىركەلدى. ءبىر بالا كوز جۇمدى، تاعى 6 بالا جانساقتاۋ بولىمىندە جاتىر. 

30 شىلدەدە ورتالىقتا ەكى بالانىڭ دەنساۋلىق جاعداي ناشارلاعان. ولار قۇسىپ، ءىشى وتكەن. 31 شىلدەدە وسى مەكەمەدەگى تاعى 10 بالادا ۇقساس بەلگىلەرى بار دەرت انىقتالىپ، اۋرۋحاناعا جاتقىزىلدى.

«دارىگەرلەر جەدەل شارالار قولدانعانىنا قاراماستان بالالاردىڭ ءبىرى قايتىس بولدى. بۇگىنگى تاڭدا التى بالا رەانيماتسيادا. قالعاندارى دارىگەرلەردىڭ باقىلاۋىندا»، - دەپ مالىمدەدى قاراعاندى وبلىسى اكىمىنىڭ ءباسپاسوز قىزمەتى.

اۋرۋحاناعا وبلىس اكىمى ەرماعانبەت بولەكپاەۆ كەلدى. ول وبلىستىق دەنساۋلىق ساقتاۋ باسقارماسىنىڭ باسشىلىعىمەن جانە ەمدەۋشى دارىگەرلەرمەن جەدەل كەڭەس وتكىزدى.

وقيعانىڭ سەبەپتەرىن انىقتاۋ ءۇشىن ارنايى كوميسسيا قۇرىلدى.

قىلمىستىق ءىس قوزعالدى جانە قاراعاندى وبلىسىنىڭ ارنايى پروكۋرورلار باسقارماسىنا بەرىلدى.

ەرماعانبەت بولەكپاەۆ تەرگەۋ ناتيجەسىندە جاۋاپتى تۇلعالار انىقتالىپ، قاتاڭ جازالاناتىنىن اتاپ ءوتتى. مەكەمە ديرەكتورىنىڭ مىندەتىن اتقارۋشى اتقاراتىن قىزمەتىنەن شەتتەتىلدى.

Abai.kz