ەكس-پرەزيدەنت نۇرسۇلتان نازارباەۆتىڭ جيەن نەمەرەسى ءنۇرالى اليەۆ جاڭا قىزمەتكە تاعايىندالدى. ول «ترانستەلەكوم» اق ديرەكتورلار كەڭەسىن باسقارادى.

«وبليگاتسيالارى قازاقستان قور بيرجاسىنىڭ (KASE) رەسمي تىزىمىندە تۇرعان «ترانستەلەكوم» اق 2023 جىلعى 25 شىلدەدەگى اكتسيونەرلەردىڭ جالپى جينالىسىنىڭ ناتيجەسىندە كومپانيانىڭ ديرەكتورلار كەڭەسىنىڭ باسشىسى تاعايىندالدى»، - دەپ حابارلادى KASE.

سونىمەن ديرەكتورلار كەڭەسى وسى ادامداردان تۇرادى: ن.ر. اليەۆ، د.ا.پوكۋپاتەلەۆ، ب.م. وتەمۇرات، ە.م.گۋماروۆ، ا.م. احمەتجانوۆ، ۆ.ا. انيحوۆسكي، ك.ۋ. يبرايموۆ.

KASE دەرەگىنشە، كومپانيا اكتسيونەرلەرگە 2022 جىلدىڭ قورىتىندىسى بويىنشا ديۆيدەندتەر تولەمەيدى.

بيىلعى شىلدە ايىنىڭ باسىندا «Unit Telecom» جشس (75%) مەن «قازاقستان تەمىر جولى» ۇلتتىق كومپانياسى (25% ) «ترانستەلەكوم» اكتسيونەرلەرى بولعان.

ەسكە سالساق، ءماجىلىس دەپۋتاتى ەرمۇرات باپي باس پروكۋرور بەرىك اسىلوۆ جولداعان ساۋالىندا كلەپتوكراتتاردىڭ ەلدەن $150 ملرد الىپ كەتكەنىن مالىمدەگەن. دەپۋتات ولاردىڭ ىشىندە، داريعا نازارباەۆا مەن ونىڭ ۇلى ءنۇرالى اليەۆتى، قايرات شارىپباەۆتى اتاعان.

«ءبىز كلەپتوكراتتار وتىز جىل بويى تالان-تاراجعا سالعان حالىق بايلىعىن ەلگە قايتارۋىمىز كەرەك. بۇل كەمىندە 150 ملرد دوللارمەن ولشەنەتىن قازىنا. ال وسى قارجىنى قايتارۋعا ءبىرىنشى كەزەكتە مىندەتتى ورگاندار «زاڭ قابىلداعان سوڭ ىسكە كىرىسەمىز» دەپ، ارقانى كەڭگە سالۋعا بولمايدى. ەلدەن جىلىستاعان اكتيۆتەرگە تىقىر تايانعان سايىن، كلەپتوكراتتار ونى ءتۇرلى سحەمالارمەن الەمنىڭ تۇكپىر-تۇكپىرىنە تىعۋ ارەكەتتەرىن جانتالاسا جاساپ جاتىر»، - دەپ مالىمدەدى.

««قازاقستان تەمىر جولى» ۇلتتىق كومپانياسى قۇرامىنان ستراتەگيالىق ماڭىزى بار «ترانستەلەكوم» كومپانياسى ەكس-پرەزيدەنت نازارباەۆتىڭ نەمەرەسى نۇرالي اليەۆكە سۋتەگىن بەرىلگەنىن، ءسىز قالاي باعالايسىز؟ بالانستىق قۇنى 250 ملرد تەڭگە تۇراتىن، جىلدىق ءتۇسىمى 80–90 ملرد تەڭگەنى قۇرايتىن ۇلتتىق مەنشىك نەبارى 18 ملرد تەڭگەگە ساتىلدى. ازىرگە مەنىڭ سىزگە جولدايتىن ساۋالىم وسى «ترانستەلەكوم» نۇرالي اليەۆكە ءار جىلدارى جالپى كولەمى 8 ميللياردقا جۋىق ديۆيدەند تولەگەن. ەندى وسىنشاما زور كولەمدەگى زاڭسىز تولەنگەن اقشانى تەزىرەك ارادا قايتارۋ كەرەك»، - دەپ مالىمدەدى ەرمۇرات باپي باس پروكۋرور بەرىك اسىلوۆقا جولداعان دەپۋتاتتىق ساۋالىندا.

پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ دەپۋتات كوتەرگەن ساۋالعا بايلانىستى:

«ترانستەلەكوم كومپانياسىنىڭ تىكەلەي ۇكىمەتكە تيەسىلى اكتسيالارى جوق. بالكىم، قازاقتەلەكومنىڭ نەمەسە باسقا دا اكتسيونەرلىك قوعامداردىڭ ۇلەسى بار شىعار؟.. بىراق اكتيۆتەردى قايتارۋ زاڭى اياسىندا زەرتتەلەتىن بولسا، قاراستىرىلۋى مۇمكىن. ويتكەنى ءالى ءتيىستى كوميسسيا قۇرىلعان جوق. بۇل ماسەلەمەن باس پروكۋراتۋرانىڭ قاراماعىنداعى ارنايى ۆەدومستۆو اينالىسادى.

ەگەر بۇكىل كريتەريلەر زاڭ اياسىنا سايكەس كەلىپ تۇراتىن بولسا، زاڭ اياسىنا تارتۋعا مۇمكىندىك بولسا، ارينە تارتىلادى»، - دەپ جاۋاپ بەردى.

ال «ترانستەلەكومنىڭ» باسشىلىعىنا كەلگەن ءنۇرالى اليەۆتى تانىمايتىنىن ايتقان.

ءنۇرالى اليەۆ 2022 جىلعى Forbes رەيتينگىنە سايكەس قازاقستاننىڭ ەڭ باي بيزنەسمەندەرى تىزىمىندە 26-شى ورىندا تۇر.

اليەۆ «Capital Holding» ينۆەستيتسيالىق جشس، «Darmen Holding» جشس-ءنىڭ تەڭ يەسى، «ترانستەلەكوم» اق-نىڭ ماجوريتارلىق اكتسيونەرى، «جاڭارتۋ» قايىرىمدىلىق قورىنىڭ جانە حالىقارالىق Snow Leopard Foundation-نىڭ قۇرىلتايشىسى.

بۇقارالىق اقپارات قۇرالدارىندا اليەۆتىڭ «ەۋروپا پليۋس قازاقستان» جشس، «تاۋەلسىز تەلەۆيزيالىق ارنا» جشس-دە ۇلەسى بار دەپ جازىلادى.

Abai.kz