شۆەتسيادا پارلامەنت عيماراتىنا جاقىن جەردە قۇران كىتابى ورتەلدى. ونى ۇيىمداستىرعان – يراك ميگرانتتارى سالۆان موميكا مەن سالۆان نادجەم. الاۋىزدىق تۋدىرۋعا قاتىستى وسىعان ۇقساس مانيفەستاتسيا وتكىزگەنى ءۇشىن ولاردىڭ ۇستىنەن قىلمىستىق ءىس بۇعان دەيىن قوزعالعان بولاتىن – ەكەۋى قۇران پاراقتارىن جاققان ەدى.

پارلامەنت الدىنداعى الاڭعا 50-گە جۋىق ادام جينالدى. ولاردىڭ دەنى جۋرناليستەر بولدى. موميكا مەن نادجەم قاسيەتتى كىتاپتى تەۋىپ، كەيىن ورتا تۇسىنداعى بەتتەرىن ورتەدى.

ۆۆس مالىمەتىنشە، دانيا مەن شۆەتسيا ۇكىمەتتەرى ءسوز جانە پىكىر ەركىندىگى پرينتسيپتەرىن بۇزباي، قۇران مەن وزگە دە ءدىني ماتىندەردى كوپشىلىك الدىندا جاعۋ اكتسيالارىنا قالايشا تىيىم سالۋعا بولاتىنىن ويلاستىرىپ جاتىر. كەيىنگى ۋاقىتتا وسىنداي اكتسيالار اتالعان ەلدەرگە ايتارلىقتاي پروبلەما تۋىنداتقان ەدى.

ەسكە سالايىق، بيىلعى ماۋسىم ايىنىڭ سوڭىندا شۆەتسيا استاناسىندا قۇران كىتابى كەزەكتى رەت ورتەلگەن بولاتىن.

قازاقستان پرەزيدەنتى قاسىم-جومارت توقاەۆ بىرقاتار ەلدە قۇراندى ورتەۋ اكتىلەرىنە قاتىستى پىكىر ءبىلدىرىپ، مۇنداي وقيعالار جالپىعا ورتاق نورمالارعا قايشى كەلەتىن اكتسيالار رەتىندە ءبىراۋىزدان ايىپتالۋعا تيىستىگىن اتاپ ءوتتى.

بۇۇ باس اسسامبلەياسى قاسيەتتى كىتاپتاردى قورلاۋعا قاتىستى كەز كەلگەن اكتىلەردى ايىپتايتىن جانە مۇنداي ارەكەتتەردى حالىقارالىق قۇقىق نورمالارىن بۇزۋ دەپ تانيتىن قاۋلى قابىلدادى.

كەيىن ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل سارسەنبى كۇنى مۇسىلمانداردىڭ قاسيەتتى كىتابى قۇراننىڭ ورتەلۋىنە قاتىستى مالىمدەمە جاسادى.

Abai.kz